Oral qalasy aýmaǵynda 100 myń sharshy metr úsh jylyjaı keshenin salý josparlanýda
ORAL. QazAqparat - Bıyl Oral qalasyna qarasty aýyldarda jalpy kólemi 100 myń sharshy metr úsh jylyjaı keshenin salý josparlanýda, dep habarlaıdy «QazAqparat» HAA tilshisi.
Shahar basshysy Narıman Tóreǵalıevtiń aıtýynsha, qazirgi tańda qalany qysqy ýaqytta kókónispen qamtamasyz etý maqsatynda 8 jylyjaı kesheni jumys jasaýda. 2016 jyly qala agroqurylymdarynyń óz qarajaty esebinen jylyjaılar aýmaǵy 16 myń sharshy metrge ósip, jalpy kólemi 28 myńǵa jetti. Mysaly, «Oral jylyjaı» JShS H.Esenjanov atyndaǵy kóshe boıynan quny 150 mln. teńgeni quraıtyn jylyjaıdy ótken jylǵy jeltoqsan aıynda salyp bitirdi. Aýmaǵy 12 myń sharshy metr jylyjaıda qyzanaq kóshetteri otyrǵyzyldy, alǵashqy ónim aldaǵy sáýir aıynda alynbaqshy.
Sońǵy kezde qala halqynyń kóbeıýine baılanysty kókónisti tutyný mólsheri artyp otyr. Kúni búginge deıin oblys ortalyǵynda jalpy syıymdylyǵy 14 myń tonna bolatyn 11 kókónis qoımasy iske qosylǵan. Bul qoımalar azyq-túlik baǵasyn retteýge septigin tıgizip keledi. Saıajaılardy qospaǵanda, qala aýmaǵynda 8 ga alma baqtary burynnan bolsa, oǵan qosa Derkól aýylynda 30 ga, Krýgloozernyı kentinde 10 ga ıntensıvti alma baǵyn otyrǵyzý oılastyrylýda. Kezinde tek Oraldy ǵana emes, búkil oblysty ónimimen qamtyǵan Barbastaýda alma baqtary bolǵany belgili.
Aıta keteıik, ótken jyly qala boıynsha 8 mlrd. teńgege jýyq aýyl sharýashylyǵy ónimderi óndirildi, bul aldyńǵy jylǵydan (4 mlrd. teńge) eki esege kóp. Barlyǵy 6 myń gektar alqapqa dándi daqyldar egilip, 8 myń tonna (gektaryna 13,6 tsentnerden) ónim jınaldy, bul 2015 jylǵydan 13 esege artyq. Sol sekildi 44 myń tonnadan astam kókónis, baý-baqsha ónimderi alynsa, sonyń ishinde 1343 ga alqapqa kartop otyrǵyzylyp, 20 myń tonna (ár gektarǵa 145 tsentnerden) ónim jınaldy. Degenmen qala turǵyndarynyń kartopty tutyný qajettiligi 27 myń tonna bolǵandyqtan, ony otyrǵyzý kólemin kóbeıtý kózdelýde.
«Bıyl Elbasymyz «Qazaqstannyń úshinshi jańǵyrýy: jahandyq básekege qabilettilik» atty Joldaýynda agroónerkásip kesheni aldyna ekologııalyq taza taǵamdar óndirý jóninde mindet qoıǵany málim. Bul rette «Kýbleı», «Jaıyq et», «Rodnık» JShS, Jelaev astyq ónimderi kombınatyn óńirdiń brendi dep aıtýǵa bolady. Endigi maqsat - óz taýarlaryn Qazaqstanǵa ǵana emes, shet elderge de jóneltetin osyndaı kásiporyndar qataryn kóbeıtý. Ónimdilikti arttyrýdyń taǵy bir joly - sýlandyrý júıelerin qalpyna keltirý. Sonda kókónis, baý-baqsha, kartop, jemshóptik daqyldar men kópjyldyq shópter egetin alqaptar aýmaǵy keńeıer edi. Bıyl qala boıynsha 4,2 myń ga sýarmaly jerlerdi qalpyna keltirý jumystary júrgizilmek. Qazirdiń ózinde 11 aýyl sharýashylyǵy qurylymymen kólemi 3,9 ga sýarmaly jerlerdi qalpyna keltirýge kelisim jasaldy. Memleket basshysynyń tapsyrmasyna sáıkes «Agrobıznes - 2020» baǵdarlamasynyń múmkindikterin paıdalanýdyń mańyzy zor. Aıtalyq, 2016 jyly atalmysh baǵdarlama aıasynda sharýa qojalyqtaryna 192 mln. teńge demeýqarjy berildi. Bul - memleket tarapynan agrarlyq salaǵa kórsetilip otyrǵan úlken qoldaý. Mundaı jumystar bıyl da jasalatyn bolady», dedi «QazAqparat» tilshisine N.Tóreǵalıev.
