Oral qalasy aýmaǵynan 200 myńǵa jýyq tekshe metr qar shyǵaryldy
ORAL. QazAqparat - Oral qalasy aýmaǵynan 200 myńǵa jýyq tekshe metr qar shyǵaryldy. Bul týraly búgin oblys ákimi Altaı Kólginov shaharda sý tasqynyna baılanysty jumys barysymen tanysqan kezde aıtyldy, dep habarlaıdy «QazAqparat» tilshisi.
Qalalyq turǵyn úı-kommýnaldyq sharýashylyǵy jáne turǵyn úı ınspektsııasy bóliminiń basshysy Baýyrjan Tuhfatovtyń málim etkenindeı, qazirgi ýaqytta Zachagan kentine qarasty «Sarytaý» shaǵynaýdanyndaǵy qar sýy aǵatyn arna arshylyp bola keldi. Budan aqqan sý Oral-Saratov joly boıyndaǵy úlken arnaǵa quıylady. Ótken jyly qala aýmaǵynan 500 myńnan astam tekshe metr qar shyǵarylsa, bul jumys bıyl da jalǵasýda.
Qala ákimi Murat Muqaevtyń aıtýynsha, 19 qar tıegishtiń kómegimen, 100-den astam tehnıka, alpysqa jýyq «KamAZ» kólikteri eki aýysymda qardy tasymaldaýda. «Jaıyq Taza Qala» JShS-nyń 300-den astam, sondaı-aq basqa da mekemeler qyzmetkerlerin jáne erikti túrde keletin 200 stýdentti qosqanda, qar arshýǵa myńǵa jýyq adam jumyldyrylǵan. Sý basý qaýpi, ásirese, qala mańyndaǵy saıajaılarǵa tónetini belgili. Sondyqtan turǵyndarǵa nusqaýlyq paraqtar taratylyp, eskertilýde.
Óńir basshysy qala aýmaǵynda sý tasqyny bolýy yqtımal ýchaskelerdiń bárin kúni buryn arshyp, qajetti sharalardyń barlyǵyn alýdy tapsyrdy.
Zachagan kentinde salynyp jatqan jańa jylyjaı qurylysy mańaıynda uzyndyǵy 1 shaqyrymǵa jaqyndaıtyn aryq qazylýda. Oǵan osy nysandy salyp jatqan qurylys kompanııasy arnaıy tehnıka shyǵarǵan. Zachagan kentiniń ákimi Ádilbek Qadyrovtyń sózine qaraǵanda, kent aýmaǵynda uzyndyǵy 20 shaqyrymnan asatyn aryq júıesi tazartylýda. Sonymen qatar keıbir jerlerge sý ótkizgish qubyrlar ornatylýda.
Osyndaı jumystar oblys aýdandarynda da júrgizilýde.
Eske sala keteıik, budan buryn 15 naýryz kúni Altaı Kólginov Tasqala aýdanynda bolyp, kóktemgi sý tasqynyna baılanysty atqarylyp jatqan jumys barysymen tanysyp qaıtqanyn jazǵan bolatynbyz.
