Oral qalasy ákimdigi kópbalaly anany sergeldeńge salyp qoıǵan
BQO sotynyń Azamattyq ister jónindegi sot alqasy atalmysh máselege núkte qoıdy.
Sot talqysynda belgili bolǵanyndaı, B.Eskendirova Oral qalasy №2 sotynyń 2018 jylǵy 24 maýsymdaǵy sheshimimen Oral qalasy ákimdiginiń 2000 jylǵy 28 naýryzdaǵy qaýlysy negizinde kópbalaly otbasy retinde turǵyn úıge muqtaj retinde tanylyp, №369 bolyp esepke qoıylǵan. Bul rette B.Eskendirovany kezekten shyǵarý jónindegi ákimdiktiń 2018 jylǵy 18 qańtardaǵy №84 qaýlysy zańsyz dep tanylyp, kúshi joıylǵan.
Sheshim zańdy kúshine enip, B.Eskendirovanyń kezegi qalpyna keltirilip, 2017 jylǵy 17 qazandaǵy jaǵdaı boıynsha onyń rettik nómiri 40 bolǵan.
Alaıda turǵyn úı komıssııasynyń 2018 jylǵy 26 jeltoqsandaǵy №23 sheshimimen otbasy quramynda alty adamy bar B.Eskendirovaǵa páter berýden bas tartylǵan. Budan keıin B.Eskendirova bul sheshimdi zańsyz dep taný týraly sotqa qaıtadan júgingen.
Oral qalasy №2 sotynyń bıylǵy 26 naýryzdaǵy sheshimimen B.Eskendirovanyń talap-aryzy ishinara qanaǵattandyrylyp, turǵyn úı komıssııasynyń atalmysh sheshimi zańsyz dep tanylyp, kúshi joıylǵan. Sot Oral qalasy ákimin zańbuzýshylyqty tolyq kólemde joıyp, B.Eskendirovanyń quqyǵy men zańdy múddesin qalpyna keltirýge mindettedi. Al B.Eskendirovanyń «Turǵyn úı-kommýnaldyq sharýashylyǵy jáne turǵyn úı komıssııasy bólimi» memlekettik mekemesi atyna bergen talap-aryzy qanaǵattandyrylmady.
Budan keıin Oral qalasy ákiminiń ókili sot sheshimin zańsyz dep taný týraly oblystyq sot alqasyna apellıatsııalyq aryz túsirdi.
Oblystyq sottyń azamattyq ister jónindegi sot alqasy 21 mamyr kúni birinshi satydaǵy sottyń sheshimin qýattap, qala ákiminiń apellıatsııalyq shaǵymyn qanaǵattandyrýsyz qaldyrdy.
Qaýly jarııalanǵan kúnnen bastap zańdy kúshine endi.
