Oral qalasynyń turǵynynan 12 kılogramm esirtki tárkilendi

ORAL. KAZINFORM — «Qarasora» jedel aldyn alý is-sharasy barysynda Batys Qazaqstan oblysynyń polıtsııa qyzmetkerleri iri kólemde esirtki zattarynyń zańsyz saqtalǵanyn anyqtady.

BQO polıtsııa departamentiniń baspasóz qyzmetinen málim etkenindeı, Oral qalasynda 39 jastaǵy turǵynnyń úıi tintilgen.

Tintý barysynda úıdiń shatyrynan ósimdik tektes zattar salynǵan úsh jáshik jáne eki polıetılen paketi, sondaı-aq qarasoraǵa uqsas 39 buta (beseýi tamyrymen, 34-i tamyrsyz) tabylyp, tárkilendi. 

— Quramynda esirtki bar ósimdikterdiń jalpy salmaǵy 9,68 kılogramm boldy. Budan bólek, 2,77 kg keptirilgen marıhýana tárkilendi. Báriniń jalpy salmaǵy 12 kılogramnan asady. Ustalǵan turǵyn kinásin moıyndady. Atalǵan derek boıynsha sotqa deıingi tergeý amaldary bastaldy, - dep habarlady vedomstvodan. 

Eske sala keteıik, budan buryn Oralda esirtki ósiretin jasyryn fıtozerthana joıylǵanyn jazǵan bolatynbyz.

Sondaı-aq BQO turǵyny 10 qap ózen shaıanymen ustaldy.