Oral qalasynyń turǵyny avtosalonnan 2,2 mln teńge óndirip aldy

ORAL. KAZINFORM – Oral qalasynyń turǵyny sot arqyly avtosalonnan 2,2 mln astam teńge óndirip aldy. 

BQO sotynyń baspasóz qyzmetinen málim etkenindeı, atalmysh turǵyn men avtosalon arasynda 2023 jylǵy 14 naýryzda avtokólikti satyp alý úshin shart jasalǵan.

2023 jyly 11 sáýirde talapker jol-kólik oqıǵasyna ushyraǵan. Budan keıin ol jaýapkerge kólikti jóndeý boıynsha qyzmet kórsetýge júgingen. Arada úsh kún ótkende, jaýapker qajetti qosalqy bólshekterdiń, materıaldardyń jáne qyzmet kórsetý qunynyń tizbesin jasap, saqtandyrý tólemi arqyly ótelgen 2 mln 217,595 myń teńgeniń smetalyq qunyn jibergen.

Talapker 15 mamyrda avtokólikti jaýapkerge jóndeýge berip, bir jyldan keıin, 2024 jyldyń 2 shildesinde ǵana qaıtaryp alǵan. Alaıda kólik jóndelgennen keıin aqaýlar anyqtalyp, ony talap qoıýshynyń ózi túzetýge májbúr bolǵan.

- Talapker avtokóliktiń sapaly jóndelmegenin negizge ala otyryp, sottan jaýapkerden ýaqtyly qyzmet kórsetpegeni úshin aıyppul men moraldyq shyǵyndy óndirýdi surady. Sot is materıaldaryn zertteı kele, talap aryzdy ishinara qanaǵattandyryp, talapkerdiń paıdasyna 18,5 myń teńge shyǵyn somasyn, 2 mln 250 myń teńge turaqsyzdyq aıybyn jáne 100 myń teńge moraldyq zalaldy óndirdi. Sheshim zańdy kúshine endi, - dep habarlady vedomstvodan.

Eske sala keteıik, budan buryn kútimsiz joldan zardap shekken Oral turǵyny zalaldy ákimdikten óndirgenin jazǵan bolatynbyz.