Oral qalasynyń ortalyǵynda aǵash ósken aýmaq qaraýsyz qalǵan
ORAL. KAZINFORM – Oral qalasynda BQO polıtsııa departamentiniń ǵımaraty aldyndaǵy aǵash ósken aýmaqtyń azyp-tozyp ketkenine ekologter nazar aýdardy.
«Batys Qazaqstan ekologııalyq geografııalyq qoǵamy» qoǵamdyq birlestiginiń tóraǵasy Darhan Sarıevtiń málim etkenindeı, ıÝ.Gagarın atyndaǵy kóshe boıyndaǵy skver kútilmegendikten, qoqys ta jatyr, aǵash-butalar beı-bereket ósip ketken.
– Qala ortalyǵyndaǵy skverge bılik oryndary jyldar boıy nelikten kóńil bólmegen? Polıtsııa departamentiniń birneshe bólinisi ornalasqan ǵımaratqa kólik jáne kóshi-qon salasyndaǵy máselemen jergilikti turǵyndar ǵana emes, sheteldik azamattar da keledi. Avtobýstan túskennen keıin atalǵan ǵımaratqa baratyn tike jol joq. Sondyqtan jylý trassasy arqyly ótetin ortalyq kireberis jol salý kerek. Ekinshiden, skverdi qalypqa keltirip, kútip ustaý jumystaryn qolǵa alý qajet. Jalpy, qaladaǵy mundaı oryndardy umyt qaldyrmaı, ońtaıly sheshimin tapqan jón, - dedi D.Sarıev.
Osy máselege oraı Kazinform tilshisi Oral qalasy ákimdigine arnaıy saýal joldady.
Ákimdikten túsken málimetke qaraǵanda, atalmysh aýmaqpen «Jaıyqjylýqýat» AQ-nyń jylý trassasy ótip jatyr.
– Oral qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi «Jaıyqjylýqýat» AQ-ǵa qala ákimdigi janyndaǵy ekologııalyq keńestiń hattamasy negizinde hat jiberdi. Onda BQO polıtsııa departamentiniń ǵımaraty aldynda ornalasqan aýmaqty sanıtarlyq tazalaý, jylý magıstrali boıynda ornalasqan aǵashtardy sanıtarlyq kesý jumystaryn júrgizý qajettigi kórsetilgen, - delingen resmı jaýapta.
«Jaıyqjylýqýat» AQ bas dırektorynyń mindetin atqarýshy Bekbolat Qameshov mundaı hattyń kele qoımaǵanyn, túsken jaǵdaıda tıisti jumystardyń atqarylatynyn jetkizdi.
Eske sala keteıik, budan buryn ekologtiń ár qalada kólemi 30 gektar bir park salynsa, artyq bolmaıtyny jóninde aıtqanyn jazǵan edik.