Oral qalasynyń kósheleri sýǵa tola bastady
ORAL. KAZINFORM — Oral qalasynda sý tasqynyna baılanysty jedel jeli iske qosyldy.
Oral qalasy ákimdiginen málim etkenindeı, sý tasqyny jaǵdaıynda turǵyndar 8-711-2-24-01-94, 8-711-2-24-05-70, 8 771 131 91 61 (WhatsApp) telefonyna habarlasa alady.
«Habarlasqan kezde azamattyń tolyq aty-jóni, mekenjaıy, telefon nómiri jáne beınejazbasy bolýy qajet. Qazirgi tańda qardyń qarqyndy erýine baılanysty sý sorý jumystaryna 60 arnaıy tehnıka, 30 motopompa tartylǵan. Kommýnaldyq mekemeniń 200 jumysshysy jumyldyrylǵan. Osy kezge deıin qala boıynsha 22 466 tekshe metr sý sorylyp, 600 myńnan astam tekshe metr qar shyǵaryldy», - dep habarlady vedomstvodan.
Qala kósheleriniń sýǵa tola bastaǵany jóninde áleýmettik jelide turǵyndar da habarlap, kómek surap jatyr.
Eske sala keteıik, budan buryn Batys Qazaqstanda qar qatty erip, ózenderde sý tasýy yqtımal ekendigin jazǵan bolatynbyz.
