Oral qalasynyń bir bóliginde gaz berý ýaqytsha toqtatylady

ORAL. KAZINFORM – Oral qalasynyń soltústik-shyǵys shaǵynaýdanynda jóndeý jumystarynyń júrgizilýine baılanysty 18 shilde kúni gaz berý ýaqytsha toqtatylady. 

Oral qalasy ákimdiginen málim etkenindeı, «QAZAQGAZ AIMAQ» AQ Batys Qazaqstan óndiristik fılıaly atalǵan aýdanda joǵary qysymdy gaz qubyrynda óndiristik josparly jumystardy júrgizbekshi.

«Gazben jabdyqtaý jumystary ýaqytsha toqtatylatyn aýmaqtarǵa 7, 9, 10-shaǵynaýdandar, Juldyz jáne Eski áýejaı, Oral-Jelaev, Oral-Býzýlýk trassasy, Juldyz, B.Jumaǵalıev, Sh.Qospanov, B.Jumanııazov, V.Pravdýhın, Táýelsizdik, Qazybek bı, Tóle bı kósheleri, Ábilqaıyr han dańǵyly kiredi. Jóndeý jumystary 18 shilde kúni saǵat 09.00-den 18.30-ǵa deıin júrgiziledi. Qalanyń atalmysh bóligi 19-20 shilde kúnderi kezeń-kezeńmen gazben qaıta qamtamasyz etiledi. Qaýipsizdik sharalary úshin gaz quraldarynyń krandaryn ajyratý qajet», - dep habarlady vedomstvodan. 

Eske salsaq, buǵan deıin Energetıka mınıstri Almasadam Sátqalıev elimizde gaz baǵasyn kezeń-kezeńinen kóterý josparlanyp otyrǵanyn aıtqan edi.