Oral qalasynyń ákimi úıi sýǵa ketken turǵynǵa 2,2 mln teńge tóleıtin boldy

ORAL. KAZINFORM – BQO mamandandyrylǵan aýdanaralyq ákimshilik sotynda shahar turǵynynyń Oral qalasynyń ákimine daý aıtýy týraly is qaraldy. 

BQO sotynyń baspasóz qyzmetinen málim etkenindeı, ótken jyly sý tasqyny saldarynan zardap shekken azamat qala jáne oblys ákimdikterine júginip, onyń turǵyn úıin turýǵa jaramsyz dep taný jáne turǵyn úı berý týraly ótinish jazǵan.

Alaıda bas tartý týraly jaýap alǵan. 

- Іsti qaraý barysynda sýdıanyń usynysymen taraptar kelisimge keldi. Kelisimniń sharttary boıynsha talapker talap qoıýdan bas tartady. Jaýapker óz kezeginde bıylǵy 1 naýryzǵa deıingi merzimde talapkerge tótenshe jaǵdaı saldarynan zardap shekken adam retinde múlikti baǵalaý týraly esepke sáıkes 2 mln 231,082 myń teńge mólsherinde zalal somasyn tóleýge mindettendi, - dep habarlady vedomstvodan.

Eske sala keteıik, budan buryn Oralda 14 jastaǵy balany urǵan satýshyǵa jaza kesilgenin jazǵan bolatynbyz.