Oral qalasynyń ákimi taǵaıyndaldy
ORAL. KAZINFORM — QR Prezıdenti Ákimshiliginiń jáne qalalyq máslıhat depýtattarynyń kelisimi boıynsha Oral qalasynyń ákimi bolyp Murat Bolatuly Baımenov taǵaıyndaldy.
Óńir basshysy Narıman Tóreǵalıev qalalyq máslıhattyń kezekten tys sessııasyna qatysyp, ákim laýazymyna kandıdatýra usyndy. Depýtattar ony qoldady.
– Murat Bolatuly kóp jyldar boıy Oral qalasynda jáne oblysymyzǵa qarasty aýdandarda jumys istedi. Barlyq máselelermen tanys. Eń bastysy, qala turǵyndary ony jaqsy biledi. Jınaqtalǵan tájirıbesi men bilimi oǵan qalanyń áleýmettik-ekonomıkalyq damýynda óziniń áleýetin iske asyrýǵa kómektesedi dep senemin, – dep atap ótti óńir basshysy.
Narıman Tóreǵalıev jańa ákimniń aldyna oblys ortalyǵynyń ınfraqurylymyn damytýdy jalǵastyrý boıynsha birqatar mindet qoıdy.
Murat Baımenov 1969 jyly dúnıege kelgen. Ár jyldary BQO qarjy basqarmasy bastyǵynyń orynbasary, Shyńǵyrlaý jáne Zelenov aýdany ákimderiniń orynbasary, BQO ákimi apparatynyń ekonomıkalyq taldaý, ishki baqylaý jáne memlekettik qyzmetter monıtorıngi bóliminiń meńgerýshisi, BQO energetıka jáne TÚKSh basqarmasy basshysynyń orynbasary, «Jaıyq jylý qýat» AQ bas dırektory qyzmetterin atqarǵan.
2020 jyldyń qazan aıynan bastap qazirgi ýaqytqa deıin Báıterek aýdany ákiminiń orynbasary qyzmetin atqardy.
