Oral qalasynyń ákimi qyzmetinen ketti

ORAL. KAZINFORM – Oral qalasynyń ákimi Mırjan Munaıdaruly Satqanov qyzmetinen ketti. Bul týraly ol Facebook jelisindegi paraqshasynda málim etti. 

M.Satqanov bul qyzmette eki jyldan astam ýaqyt boıy oraldyqtarmen qoıan-qoltyq jumys istegenin atap ótti.

«Densaýlyǵym syr berip, qyzmetten budan buryn ketýdi oılap júrgenmin. Alaıda kóktemde qalamyzda sý tasqyny bolyp, mundaı qıyn kezeńde jumystan shyǵa almadym. Osylaısha óz mindetterimdi áriptesterimmen birge jalǵastyra berdim. Biz barsha oraldyqtarmen birge úlken jumys isdedik dep oılaımyn. Tek kóktemgi sý tasqynymen kúresip, onyń saldarymen aınalysqan kezde ǵana emes, sonymen birge 2 jyl boıy súıikti qalamyzdy odan ary kórkeıtýge tyrystyq. Bul – týǵan jerine janashyr ár azamattyń ólsheýsiz eńbegi. Qazir barlyq salada jumys jolǵa qoıylǵan. Jańadan taǵaıyndalatyn qala ákimi óńirdegi jaǵdaıdy jedel túsinip, jumysty júıeli jalǵastyratynyna, al bolashaqta shaharymyz úshin jańa jobalarǵa bastamashy bolatynyna senemin», - dep jazdy M.Satqanov.

Mırjan Satqanov Oral qalasynyń ákimi bolyp 2022 jyly 26 sáýirde taǵaıyndalǵan edi. 

Eske sala keteıik, budan buryn Oral qalasyna jańa ákim taǵaıyndalǵanyn jazǵan edik. Sondaı-aq Qaıyrjan Meńdiǵalıev Batys Qazaqstan oblysy ákiminiń orynbasary boldy.