Oral qalasyndaǵy Shaǵan sý qoımasynyń deńgeıi 30 metrge jetti
ORAL. KAZINFORM — Batys Qazaqstan oblysynda «Qazsýshar» RMK sý qoımalary 81 paıyzǵa toldy. Qazir ondaǵy sý kólemi – 410,2 mln tekshe metr.
«Qazsýshar» RMK Batys Qazaqstan fılıalynyń basshysy Raýan Husaıynovtyń aıtýynsha, Oral qalasynda Shaǵan sý qoımasynyń deńgeıi 30 metrge jetti.
Raýan Erlanulynyń sózine qaraǵanda, qazirgi kezde Jaıyq pen Shaǵan ózeninde sý deńgeıi teńesti. Onyń ústine Shaǵanǵa da joǵary jaqtan sý kelip jatyr. Sýdy jazǵy-kúzgi mezgilge saqtap qalý úshin sý tastaǵysh ımarat tasqyn mólsheri azaıǵan kezde jabylatyn bolady.
«Reseı Federatsııasynyń Orynbor jáne Saratov oblystaryndaǵy sý sharýashylyǵy qyzmetterimen kún saıyn aqparat almasyp otyrmyz. Orynbor oblysynda ornalasqan Irekli sý qoımasynan Jaıyq ózenine sekýndyna 345 tekshe metr sý jiberilýde. Al Jaıyq ózeninen Jaıyq-Kóshim júıesine sekýndyna 123 tekshe metr sý túsýde. Qazirgi tańda sý qoımalaryna sý jınalýda. Kóltabandar men tabıǵı shabyndyqtarǵa sý berý bastaldy. Sol sekildi Saratov oblysyndaǵy Prıýzen sý qoımasynan Qaraózenge sekýndyna 12 tekshe metr sý tastalýda. Kaztalov pen Jańaqala aýdandary arqyly ótetin Qaraózen men Saryózenge 400 mln tekshe metrden astam tasqyn sý alyndy. Jalpy, fılıaldyń sý qoımalarynda jaǵdaı qalypty», dedi R.Husaıynov.
Eske sala keteıik, budan buryn Jaıyq ózenindegi sý deńgeıi ıAnvartsev gıdrobeketinde 16 santımetrge joǵarylaǵanyn jazǵan bolatynbyz.
Batys Qazaqstan oblysynda 3 myńǵa jýyq saıajaı úıi sý astynda qaldy.
