Oral qalasyndaǵy saıajaılar tekserilip jatyr
ASTANA. KAZINFORM – Batys Qazaqstan oblysynda Jaıyq ózenindegi sý deńgeıine monıtorıng júrgizilip jatyr. Azamattardy qulaqtandyrý jáne teleradıo arqyly habarlandyrý ár tórt saǵat saıyn júzege asady.
Bul aımaqqa TJM qosymsha kúshteri men quraldary tartylyp otyr. Olar ýchaskelerge bólinip, qyzý jumysqa kiristi. Bul týraly Ortalyq kommýnıkatsııalar qyzmetinde ótken brıfıngte QR TJM ókili Asqar Shárip OKQ aıtty.
«Ótken táýlikte Stenovık saıajaıynda 4 adam qutqaryldy. 61 adam evakýatsııalandy. Qalǵan turǵyndar buǵan deıin qaýipsiz jerge qonystanǵan bolatyn. 1497 adam ýaqytsha ornalasý pýnkterine, qalǵany týystarynyń úılerine ornalasty. Saıajaı úılerinde qalyp qoıǵan adamdardyń bar-joǵyn tekserý úshin aralaý jumystary jalǵasyp jatyr», – dedi ol.
Osy ýaqytqa deıin elimiz boıynsha 23 085 adam óz úılerine oralǵan. Ázirge 8872 adam, onyń ishinde 3852 bala evakýatsııalyq pýnktterdi panalap otyr.
Aıta keteıik, buǵan deıin Jaıyq ózenindegi sý deńgeıi Oral qalasy gıdrobeketinde 862 santımetrge (qaýipti shegi – 850 sm) jetkeni habarlanǵan bolatyn.
