Oral qalasyndaǵy keıbir mektepterde synyp bólmeleri salqyn

Oral qalasyndaǵy keıbir mektepterde synyp bólmeleri salqyn, dep habarlaıdy Kazinform. 

Oral qalasy bilim berý bóliminen málim etkenindeı, qazirgi ýaqytta sol mektepterde oqý protsesin júrgizý jyly kabınetterge aýystyrylyp jatyr.Sonymen qatar «Jaıyqjylýqýat» AQ mamandary shaqyrtylyp, synyp bólmeleri salqyn bolýynyń sebebi anyqtalý ústinde.

«Qalanyń barlyq mektepterinde jaýapty mamandar synyp kabınetteriniń aýa temperatýrasyn ólshep, bilim bólimine ýaqytyly habarlap otyr. Sanıtarlyq talapqa saı oqý kabınetterinde aýa temperatýrasy 18 gradýstan tómen bolmaýy tıis. Bilim berý uıymdary qys maýsymyna daıyndyq jumystaryn merziminde júrgizdi. Tamyz aıynda «Jaıyqjylýqýat» mekemesinen daıyndyq aktisin aldy», - dep habarlady vedomstvodan.

Eske sala keteıik, budan buryn Oral qalasynda jylý qubyry jarylyp, mekeme jylýsyz qalǵanyn jazǵan bolatynbyz.

Oral qalasy ákiminiń orynbasary Jandos Dúısenǵalıev qazirgi ýaqytta oblystyq halyq shyǵarmashylyǵy ortalyǵyna jylýdyń qosylǵanyn habarlady.