Oral qalasyndaǵy dúkenderde tuz tapshylyǵy týyndady

ORAL. KAZINFORM — Oral qalasyndaǵy birqatar saýda oryndarynda as tuzy satylyp jatsa, keıbirinde joq bolyp shyqty.

Zachagan kentindegi Oral-Saratov tas joly boıyndaǵy «Altyndar» sýpermarketinde as tuzy sóresi bos tur.

Dúken qyzmetkerleriniń sózine qaraǵanda, tuz bir-eki kúnnen beri joq. 

Esesine 152-atqyshtar brıgadasy kóshesi boıyndaǵy «Shaǵataı» azyq-túlik dúkeninde as tuzy satylyp jatyr.

Turǵyndardyń aıtýynsha, qalada tuz izdep júrgender barshylyq. Sonymen qatar tapshylyqqa baılanysty tuzdyń qymbattap ketkenin de sóz qylyp jatqandar bar.

Osyǵan oraı BQO ákimdiginiń baspasóz qyzmetinen alynǵan málimetke qaraǵanda, Batys Qazaqstan oblysynyń halqy aıyna 90 tonnadaı tuzdy tutynady. 

Onyń negizgi bóligi (80 paıyzdaıy) 270 km qashyqtyqta ornalasqan kórshiles Orynbor oblysy Sol-Iletsk qalasyndaǵy «Rýssol» jaýapkershiligi shekteýli qoǵamynan jetkiziletin. Atalmysh kompanııadan taýardyń jóneltilýi toqtap qalǵandyqtan, BQO-nyń kóterme ónim jetkizýshileri qazaqstandyq ónimge aýysýǵa májbúr bolǵan. 

- Oblystaǵy jaǵdaıdy turaqtandyrý jáne tuzben tolyq qamtamasyz etý úshin «Araltuz» AQ jáne «Abzal ı K» JShS-men (Qyzylorda oblysy) kelisim-shart jasaldy. Ónim óndirýshi alysta (1 040 km) bolǵandyqtan, tuz vagondarmen 4-5 kún ishinde jetkiziledi. Qazirgi kezde qazaqstandyq ónim óndirýshilermen 5 vagon (300 tonna) tuz jetkizýge kelisilgen. Sonyń bireýi (60 tonna) 30 qarashada kelmekshi. Qalǵan 4 vagon tuz (240 tonna) 5-7 kúnde jetpekshi. Budan keıin de tuzdy oblysqa úzdiksiz ákelý úshin kelisim jumystary jalǵasatyn bolady, - delingen resmı jaýapta. 

Eske sala keteıik, budan buryn Oralda avtogaz quıý stantsııalarynda uzyn-sonar kezek tyıylmaı turǵanyn jazǵan edik.