Oral qalasyndaǵy 24 kópqabatty turǵyn úı kúrdeli jóndeýden ótedi

ORAL. KAZINFORM — Qazaqstan Respýblıkasynyń turǵyn úı-kommýnaldyq sharýashylyǵyn jańǵyrtý jáne damytý tujyrymdamasy aıasynda kópqabatty turǵyn úılerdiń jaǵdaıyn jaqsartýǵa bolady. 

Oral qalasynyń ákimi Murat Baımenovtiń málim etkenindeı, atalǵan tujyrymdama aıasynda byltyr kópqabatty turǵyn úılerdi kúrdeli jóndeý boıynsha 879 mln teńgege 26 joba júzege asyrylǵan.

Onyń sózine qaraǵanda, bıyl 11 jedelsatysyn aýystyrýmen birge 245 mln teńgege osyndaı 11 joba qolǵa alyndy.

— 2026 jyly 811 mln teńgege 24 kópqabatty turǵyn úıdi kúrdeli jóndeýden ótkizý josparlanyp otyr. Buǵan úıdiń shatyry men negizgi tireýishterin jóndeý, jedelsatylardy aýystyrý kiredi, - deıdi M.Baımenov.

Qala ákiminiń aıtýynsha, kúrdeli jóndeý baǵdarlamasyna turǵyndardyń ózderi de atsalysa alady. Ol úshin aldymen páter ıeleriniń jınalysyn ótkizý qajet. Turǵyndardyń kópshiligi kelisim bergen kezde oblystyq energetıka jáne turǵyn úı-kommýnaldyq sharýashylyq basqarmasy úıdi tehnıkalyq tekserýden ótkizedi. Sodan keıin kúrdeli jóndeý úshin jobalyq-smetalyq qujattama jasalady.

Sol sekildi shahardy abattandyrý maqsatynda «Halyq qatysatyn bıýdjet» baǵdarlamasy aıasynda qala turǵyndary eń ózekti, mańyzdy ári qajetti jobalardy ózderi usynyp, daýys berý arqyly tańdaıdy.

Keıingi tórt jylda osyndaı tásilmen jańa skverler salý men demalys aımaqtaryn jóndeýge arnalǵan 11 joba tańdalyp, tolyqtaı júzege asyryldy. Bıyl 6 joba aqtaldy. 

Qala ákimdiginiń resmı saıtynda «Halyq qatysatyn bıýdjet» jobasyna arnalǵan jańa usynystar qabyldanady.

— Sondaı-aq bıyl qalada úılerdiń biryńǵaı sáýlettik jáne kórkem kelbetin qalyptastyrý maqsatynda 57 kóppáterli turǵyn úıdiń qasbetterin syrlaý jumystary júrgizildi. Osy jumystarǵa 2,0 mlrd teńge bólindi. Oǵan qosa demeýshilerdiń qoldaýymen qaladaǵy 10 úıdiń qasbetine túrli taqyryptarǵa, sonyń ishinde jumysshy mamandyqtaryna, óńirden shyqqan tulǵalarǵa, otbasy qundylyqtaryna, ult birligine jáne qala tazalyǵyna arnalǵan mýraldar salyndy. Mundaı bastamalar aldaǵy ýaqytta da jalǵasyn tabady, - dedi qala basshysy.

Eske sala keteıik, budan buryn Oralda aldaǵy eki jylda 3 magıstraldyq jylý jelisin jańǵyrtý kózdelip otyrǵanyn jazǵan bolatynbyz.