Oral qalasynda jylý qubyrlary nege tolyq jabylmaǵan
ORAL. KAZINFORM – Jylytý maýsymy kezinde jylý qubyrlarynan aqaý shyqpaýy asa mańyzdy. Bul másele Oral qalasy turǵyndaryn da alańdatyp otyr.
Instagram áleýmettik jelisinde jarııalanǵan aqparatta ıAroslavskaıa kóshesinde jylý trassasynyń tolyq jasalmaǵany aıtylady.
- Jylý qubyrlarynyń qosylǵan jerleri maýsym aıynan beri ashyq tur. Biz kósheni jylytamyz ba? Sol úshin tóleımiz be? – deıdi qala turǵyny.
Osy máselege oraı Oral qalasy ákimdigi túsinik berdi.
Ákimdikten alynǵan málimetke qaraǵanda, bul jumystar belgili bir tártippen jáne talaptarǵa saı júrgiziledi. Eń aldymen qubyrdyń qosylǵan jerlerin (styktardy) jaýyp tastamas buryn tolyq tekserý jasalady. Barlyq dánekerlengen nemese jalǵanǵan tustar túgeldeı tekseriledi. Arnaıy synaq júrgizilip, qubyrǵa sý men joǵary qysym beriledi. Sol kezde jarylý, aǵyp ketý nemese qosylystardan sý shyǵý sııaqty aqaýlardyń bar-joǵy anyqtalady.
- Eger synaq kezinde bári durys bolsa, «synaqtan ótti» degen akt toltyrylady. Tek sodan keıin ǵana sol ýchaskeler jabylyp, jeri qalpyna keltiriledi. Bul tekseris óte mańyzdy. Sebebi eger qosylystardy teksermeı jaýyp tastasa, keıin sý ketip nemese aqaý shyqqan jaǵdaıda ony tabý qıyn bolady. Sondyqtan barlyq jumys qaýipsizdik pen sapa talaptaryna saı kezeń-kezeńmen oryndalady, - delingen resmı jaýapta.
«Jaıyqjylýqýat» AQ málimeti boıynsha oblys ortalyǵynda jylý 7 qazannan berile bastady. Búgingi tańda kópqabatty 1 217 úıdiń 1 205-i jylýǵa qosylǵan. Qalǵan 12 úıge aptanyń sońyna deıin jylý beriledi. Áleýmettik nysandardyń barlyǵy jylýmen tolyq qamtylǵan.
Eske sala keteıik, budan buryn Batys Qazaqstanda jylytý maýsymy qazannyń alǵashqy jartysynda bastalatynyn jazǵan edik.