Oral qalasynda jeke turǵyn úı salý úshin jer telimi berile me
ORAL. KAZINFORM — Oral qalasy boıynsha jeke turǵyn úı qurylysy úshin jer telimin surap jazǵan barlyǵy 111 338 azamat arnaıy esepte tirkelgen.
Oral qalasy jer qatynastary bóliminiń basshysy Mıras Ǵadiljanulynyń málim etkenindeı, 2000-2026 jyldar aralyǵynda oblys ortalyǵynda jalpy kólemi 1 500 gektardan astam jer telimi 15 myń azamatqa berildi.
Onyń sózine qaraǵanda, bul jer telimderi shahardaǵy ekinshi, úshinshi jáne 3A-egjeı-tegjeıli josparlaý jobasy, «Soltústik-Shyǵys», «Eski áýejaı», «Juldyz», «Balaýsa», «Bolashaq», «Arman», «Kóktem», «Keń dala», «Sarytaý», «Saryarqa», «Kókjıek» shaǵynaýdandary jáne Krýgloozernyı kentinde ornalasqan.
— 2022 jyldyń sáýir aıynan bastap jeke turǵyn úı qurylysy úshin ótinishter elektrondy (egov.kz) portal arqyly júrgiziledi. Elektrondyq kezek bastalǵanǵa deıin Oral qalasynda 72 myńǵa jýyq azamat kezekte turdy. Elektrondyq kezek bastalǵannan keıin 32 myńnan astam adam qosyldy. Mysaly, 2025 jyly — 431, bıyl 180 azamat tirkeldi, — deıdi M.Ǵadiljanuly.
Bólim basshysynyń aıtýynsha, jeke turǵyn úı qurylysy úshin jer telimderin berý tek Oral qalasynda emes, respýblıka kóleminde ózekti másele bolyp esepteledi. Sebebi QR Jer kodeksiniń 44-babyna sáıkes jeke turǵyn úı qurylysy úshin jer telimderi suralǵan kezde azamattardyń ótinishteri (ótinishhattary) arnaýly esepke alynady. Oǵan qosa bólip berýge arnalǵan alańdardyń daıyn bolýyna qaraı ne jeke turǵyn úı qurylysy úshin paıdalanylatyn bos aýmaqtar bolǵan kezde qanaǵattandyrylady. Azamattarǵa jeke turǵyn úı qurylysy úshin jer telimderin berý qaǵıdalaryn ortalyq ýákiletti organ bekitedi. Jeke turǵyn úı qurylysy úshin jer telimderin tegin negizde berý kezinde azamattyń jeke turǵyn úı qurylysy úshin memleket quqyq bergen jer telimderiniń bar nemese joq ekendigi eskeriledi.
— Oral qalasy boıynsha bólip berýge arnalǵan alańdardyń daıyn bolmaýyna baılanysty aldaǵy ýaqytta jer telimderin berý jumystary júrgizilmeıdi, — dedi M.Ǵadiljanuly.
BQO jer qatynastary basqarmasynyń málimeti boıynsha oblysta barlyǵy 172 525 adam jer kezeginde tur. 2021 jyly — 250, 2022 jyly — 857, 2023 jyly — 266, 2024 jyly — 353, 2025 jyly 235 jer telimi berilgen.
Bıyl oblys boıynsha 1 264 jer telimin berý kózdelse, sonyń 527-si Terekti, 98-i Qaratóbe, 92-si Báıterek, 82-si Aqjaıyq, 79-y Bórli, 66-sy Jańaqala, 61-i Kaztalov aýdanynyń úlesine tıedi.
Eske sala keteıik, budan buryn Batys Qazaqstanda 43 myńnan astam adamnyń turǵyn úı kezeginde turǵanyn jazǵan bolatynbyz.
