Oral qalasynda jańadan shyrsha satyp alynbaıdy

ORAL. KAZINFORM – Jańa jyldy merekeleýge oblys boıynsha Oral qalasy men aýdandar bıýdjetinen shamamen 28 mln teńge bólindi. 

BQO ákimdiginen málim etkenindeı, jańa jyldyq shyrshalar Oral qalasynda Tuńǵysh Prezıdent alańynda, qalalyq mádenıet jáne demalys saıabaǵynda, «Lepestok» skverinde, Krýgloozernyı, Derkól kentinde, Zachaganda M.Móńkeuly kóshesinde, sondaı-aq 12 aýdan ortalyǵynda ornatylady.

«Buryn satyp alynǵan jańa jyldyq áshekeıler paıdalanylady. Jańa shyrsha men qalany bezendirý úshin jańa jyldyq atrıbýttardy satyp alý josparlanǵan joq. Oblys turǵyndary úshin jańa jyldyq merekelik baǵdarlamalar, sonyń ishinde Prezıdenttik shyrsha, múmkindigi shekteýli jáne az qamtylǵan otbasylardan shyqqan balalarǵa arnalǵan jáne basqa da is-sharalar uıymdastyrylady», - delingen BQO ákimdigi usynǵan aqparatta.

Oral qalasy ákimdiginiń naqtylaýynsha, jańa jyl merekesine oraı basty is-shara bıyl da 31 jeltoqsan kúni QR Tuńǵysh Prezıdenti alańynda ótedi.

Jańajyldyq is-sharalarǵa 7,5 mln teńge qarastyrylǵan. Osy qarjyǵa Tuńǵysh Prezıdent alańynda qurylatyn bas shyrshanyń montajy men demontajy, sonymen qatar alańdy jańajyldyq bezendirý, shaǵyn arhıtektýralyq formalardy ornatý jumystary 17-sinen 27 jeltoqsanǵa deıin júrgiziledi. Bas shyrshanyń bıiktigi - 24 metr. Shaǵyn arhıtektýralyq formalar H.Bókeeva atyndaǵy qazaq drama teatry alańy men Tuńǵysh Prezıdent alańyna qoıylady.

«Jastar mádenıet úıiniń uıymdastyrýymen 20-30 jeltoqsan aralyǵynda Saltanat saraıy zalynda jańajyldyq erteńgilikter ótedi. Al 23-24 jeltoqsan kúnderi múdedektigi bar jáne kópbalaly otbasynan shyqqan balalarǵa, ıaǵnı 240 balaǵa Saltanat saraıynyń meıramhanasynda qala ákiminiń jańa jyldyq shyrshasy uıymdastyrylady. Osy erteńgilikterde balalarǵa arnap dastarhan jaıylyp, estelik syı men tátti syılyqtar beriledi. Zachagan, Derkól, Jelaev, Krýgloozernyı kenttik okrýgterinde jańa jylǵa arnalǵan merekelik kontsertter ótedi. Sondaı-aq aýla klýby, komıýnıtı, kitaphanalarda kelýshilerge arnalǵan shaǵyn erteńgilikter ótkiziledi. 31 jeltoqsan kúni keshki saǵat 20.00-de Tuńǵysh Prezıdent alańynda óńirimizdiń ónerpazdary daıyndaǵan merekelik kontsert qala turǵyndary nazaryna usynylady. Kontsert saǵat 23.00-de otshashýmen aıaqtalady», - dep habarlady vedomstvodan.

Eske sala keteıik, budan buryn Aqtaýda jańa jyldyq bezendirýge qansha qarjy jumsalatynyn jazǵan bolatynbyz.