Oral qalasynda jańa ústel tennısi ortalyǵy boı kóteredi
ORAL. KAZINFORM — Oral qalasynda Ústel tennısi ortalyǵyn salý jónindegi úshjaqty memorandýmǵa qol qoıyldy.
Batys Qazaqstan oblysynyń ákimi Narıman Tóreǵalıev, QR ústel tennısi federatsııasynyń atqarýshy hatshysy Danııar Ahmetov, oblystyq máslıhat tóraǵasy Murat Muqaev jáne oblystyq máslıhat depýtattary, turaqty komıssııa tóraǵalary Erbol Salyqovtyń, Borıs Lavrentevtiń, oblystyq dene shynyqtyrý jáne sport basqarmasynyń basshysy Baqdáýlet Sábıtovtyń qatysýymen shahardyń qarqyndy damyp kele jatqan «Aqjaıyq» shaǵyn aýdany aýmaǵynda «Freedom Shapagat» qorynyń basshysy Baǵlana Mýsınamen kezdesý ótti.
Kezdesýdiń basty maqsaty — óńir úshin mańyzdy jańa sporttyq nysan — zamanaýı ústel tennısi ortalyǵynyń qurylysyna qatysty máselelerdi talqylaý jáne yntymaqtastyq baǵyttaryn naqtylaý boldy.
Atalǵan joba ınfraqurylymdy damytýǵa, buqaralyq sportty órkendetýge jáne jastar arasynda ústel tennısin keńinen nasıhattaýǵa baǵyttalǵan mańyzdy qadam bolyp tabylady.
Sonymen qatar «Freedom Shapagat qory» dırektory Baǵlana Mýsına, BQO dene shynyqtyrý jáne sport basqarmasy jáne merdiger «InterStroı NS» kompanııasymen birlesip, Oral qalasynda Ústel tennısi ortalyǵyn salý jónindegi úshjaqty memorandýmǵa qol qoıyldy.
Bul — óńir úshin asa mańyzdy oqıǵa. Jańa ortalyq sporttyq ınfraqurylymdy damytýǵa, buqaralyq sportty óristetýge jáne jastar arasynda ústel tennısin keńinen nasıhattaýǵa serpin beretin naqty qadam bolmaq.
Qazirgi tańda óńirimizde ústel tennısimen 6000-ǵa jýyq adam aınalysady. Bul sport túri elimizdegi jetekshi baǵyttardyń birine aınalyp otyr.
Ulttyq quramanyń músheleri Kenjıgýlov Aıdos pen Dastan, sondaı-aq Sanjar Jýbanov syndy sportshylarymyz — óńir maqtanyshtary. Olardyń jattyqtyrýshysy — Nazarova Sarvar Rızoevna.
— Osy jobanyń jeke ınvestor tarapynan júzege asýyna qoldaý kórsetkeni úshin Freedom Holding Corp. Negizin qalaýshy Tımýr Týrlovqa, «Freedom Finance Shapagat» qoryna alǵys bildiremiz! Jańa ortalyqtyń qurylys 2026 jyly bastalady dep josparlanýda. Bul bastama elimizde ústel tennısi sportynyń odan ári damýyna jáne halyqaralyq deńgeıde jańa jetistikterge jetýge jol ashady. Barlyq seriktesterge senim bildirip, qoldaý kórsetkenderi úshin alǵys aıtamyz! Birlese atqarǵan jumys — óńir sportynyń jańa belesi bolmaq, - QR ústel tennısi federatsııasynyń atqarýshy hatshysy Danııar Ahmetov.