Oral qalasynda zańsyz dep tanylǵan birneshe qurylys nysany buzyldy
ORAL. KAZINFORM — Batys Qazaqstan oblysynyń memlekettik sáýlet-qurylys baqylaýy basqarmasy jospardan tys tekserýler nátıjesinde Oralda qurylys jáne qala qurylysy qyzmeti salasyndaǵy zańnama talaptarynyń buzylýyna baılanysty nysandardy buzý týraly 7 nusqama berdi.
Basqarmadan málim etkenindeı, kúni búginge deıin úsh nysan boıynsha nusqamalar tolyq oryndaldy.
Atap aıtqanda, óz betimen qurylys salýshylar nusqamany erikti túrde oryndap, nysandardy buzdy. Sonyń ishinde H.Esenjanov kóshesi 36-mekenjaıynda ornalasqan sýpermarket ruqsat qujattary alynǵannan keıin qaıta boı kóterdi. Sondaı-aq «Kóktem» baý-baqsha seriktestigi 134-ýchaskesinde ornalasqan uıaly baılanys operatorynyń antenna-dińgek nysany buzyldy. Al Táýelsizdik kóshesi, 12 jáne Naýryz kóshesi 1/2-mekenjaılarynda kóppáterli turǵyn úı salýshylar ruqsatyn rásimdep, qazirgi tańda qurylysyn júrgizip jatyr.
Oǵan qosa J.Dosmuhamedov 33-mekenjaıynda zańsyz salynǵan tórt qabatty turǵyn úı sot sheshimimen buzylyp jatyr.
- Eki nysan boıynsha (M.Mámetova kóshesi, 53, keńse jáne R.Egizbaev kóshesi, 155, eki qabatty eki páterli turǵyn úı qurylysy) sot tártibimen basqarma nusqamasynyń kúshi joıyldy, ıaǵnı durys emes dep tanyldy. Taǵy eki nysan boıynsha (Táýelsizdik kóshesi, 39, 4 qabatty kóppáterli úı jáne A.Rahmetov kóshesi, 13, kóppáterli turǵyn úı qurylysy) búgingi tańda sot protsesteri júrgizilýde. Jalpy, nusqamaǵa sáıkes qurylys nysandaryn buzý QR Ulttyq ekonomıka mınıstriniń 2015 jylǵy 30 qarashadaǵy №750 buıryǵymen bekitilgen qurylys salasynda qurylys júrgizýdi uıymdastyrý jáne ruqsat berý rásimderinen ótý qaǵıdalaryna sáıkes júzege asyrylady, - dep habarlady vedomstvodan.
Eske sala keteıik, budan buryn Batys Qazaqstanda 40-tan astam nysanda qurylys talaptary saqtalmaǵanyn jazǵan bolatynbyz.
Sondaı-aq Oralda turǵyndar jańadan salynǵan úıge nelikten kire almaı otyrǵany habarlandy.
Oralda úleskerlerdiń máselesin sheshý jóninde jumys toby qurylatyn boldy.
