Oral qalasy Zachagan kentinde ákim saılandy
ORAL. KAZINFORM – 1 jeltoqsan kúni Oral qalasynda Zachagan kentiniń ákimin saılaý ótkizildi.
BQO aýmaqtyq saılaý komıssııasynan túsken málimetke qaraǵanda, saılaýshylar tizimine barlyǵy 44 289 adam engizilse, sonyń 5 118-i daýys berýge qatysty.
Daýys berýge qatysqandardyń 3 190-y Aqqalı Áýbekerovti jaqtady. 1 068-i Álibek Sársenovti qoldasa, 349-y Tatıana Sýmkınany jaqtap, daýys berdi.
Aqqalı Áýbekerov 1963 jyly dúnıege kelgen. Osyǵan deıin Zachagan kentiniń ákimi qyzmetin atqarǵan ol óz ornynda qaldy.
Sonymen qatar, 1 jeltoqsan kúni óńirde alty aýyldyq okrýgte ákimder saılandy. Atap aıtqanda, Báıterek aýdany Makarov aýyldyq okrýginde Erkin Ábilkákimov, Jánibek aýdany Talov aýyldyq okrýginde Asqar Sársenǵalıev, Syrym aýdany Jympıty aýyldyq okrýginde Meıram Qaıyrǵalıev, Terekti aýdany Qumaqsaı aýyldyq okrýginde Serjan Mádıev, Kaztalov aýdany Taldyapan aýyldyq okrýginde Qaıyrly Jumaǵulov, Tasqala aýdany Qazaqstan aýyldyq okrýginde Erjigit Raspaev ozyp shyqty.
Eske sala keteıik, budan buryn Batys Qazaqstan oblysynda 444 myńnan astam daýys berýshi tirkelgenin jazǵan bolatynbyz.