Oral qalasynda úılerge qar sýy kirip jatyr
ORAL. KAZINFORM — Oral qalasynda úılerge qar sýy kirdi. Buǵan tolassyz jaýǵan jańbyr da áser etti.
Oral qalasy ákimdiginiń baspasóz qyzmetinen málim etkendeı, resmı túrde naqty anyqtalǵany – ázirge úsh úıge sý kirgen. Atap aıtqanda, Qasym Ahmırov kóshesi 3, Qobylandy batyr kóshesi 34 jáne Kóshim kóshesi 34-mekenjaıynda osyndaı oqıǵa boldy.
«Qazirgi kezde qala ákimdigi men Tótenshe jaǵdaı basqarmasynyń qyzmetkerleri oqıǵa ornyna baryp, máseleni anyqtap, qolushyn sozyp jatyr. Sý sorý jáne basqa jumystar atqarylýda», - dep habarlady vedomstvodan.
Úıine sý kirgen turǵyndar beınejazbalarymen bólisip jatyr. Zachagan kentinde Eset Ázerbaev kóshesi 13-úıde turatyn Altynaı Moldaǵalıevanyń aıtýynsha, kósheniń sýy aýlaǵa qaraı aǵyp, toltyrǵan.
«Aýlanyń ishi, saraı, jerqoıma sýǵa toldy. Sý senege, zalǵa kirdi. Mana úsh mashına kelip, soryp ketken. Taǵy da kútip otyrmyz», - dedi Kazinform tilshisine A.Moldaǵalıeva.
BQO TJ departamentiniń málimeti boıynsha táýlik ishinde erigen qar sýyn sorý boıynsha 696 ótinim túsken. Sonyń ishinde Tótenshe jaǵdaılar departamenti jáne jergilikti atqarýshy organdar 609 ótinimdi pysyqtaǵan, 87 ótinim baqylaýda. Bir táýlikte 39 835 sý sorylyp, oǵan 370 adam jumyldyrylyp, 157 tehnıka, 85 motopompa tartylǵan. Sondaı-aq oblysta sý shaıyp ketken joldar sany beseýge jetti. Búgin Terekti aýdany Ańqaty aýyldyq okrýginde Qandyq aýyly tusynda aýdandyq mańyzy bar Saryómir-Ańqaty jolynyń ústine sý shyǵyp ketti. Terekti aýdanynyń Bogdanov aýyly mańynda oblystyq mańyzy bar Terekti-Aqsaı avtojolynyń 19-shaqyrymynda osyndaı oqıǵa boldy. Eki jerde de kólik qozǵalysy buzylǵan joq.
Eske sala keteıik, budan buryn Oralda aýlasyn sý basqany jóninde turǵyndardan 600-ge jýyq ótinish túskenin jazǵan bolatynbyz.
Sondaı-aq Batys Qazaqstanda joldy sý shaıyp ketýine baılanysty bir aýyl qatynassyz qaldy.
