Oral qalasynda úılerdiń basym kópshiligine jylý berildi

ORAL. KAZINFORM – Oral qalasynda kóp qabatty turǵyn úılerdiń negizgi bóligi jylýǵa qosyldy.

Oral qalasy ákiminiń orynbasary Jandos Dúısenǵalıevtiń Kazinform tilshisine málim etkenindeı, oblys ortalyǵynda kóp qabatty 1 215 úı bolsa, sońǵy eki kún ishinde sonyń 1 048-ine jylý berildi.

«Qalǵan 167 kóp qabatty úıdiń qubyryna da jylý kelip tur. Bul úılerde PIK nemese basqarý nysanyn retteý, ishki jylytý júıelerin jýyp-shaıý jumystaryn atqarý qalyp tur. Muny sársenbi kúni aıaqtaý kózdelýde. Sonda barlyq úı jylýǵa qosylatyn bolady. Jylý qubyrlarynda qandaıma bir másele týyndasa, «Jaıyqjylýqýat» AQ-nyń kezekshi brıgadalary qarap, jóndep beredi», - dedi J.Dúısenǵalıev. 

Eske sala keteıik, budan buryn Oral qalasynda turǵyn úılerge jylý qashan qosylatynyn jazǵan bolatynbyz.

Ótinimderge sáıkes mektep, balabaqsha, aýrýhana sekildi áleýmettik mekemelerge jylý ótken aptada berildi.