Oral qalasynda turatyn 8 maıdangerge birjolǵy kómek kórsetildi

ORAL. KAZINFORM — Oral qalasynda Ekinshi dúnıejúzilik soǵysqa qatysqan 9 ardager turady.

Qala ákiminiń orynbasary Aslan Tapıshevtiń málim etkenindeı, Jeńistiń 80 jyldyǵy qarsańynda áleýmettik qoldaý aıasynda 8 maıdangerdiń árqaısysyna 5 mln teńgeden, barlyǵy 40 mln teńge tólendi.

Onyń sózine qaraǵanda, soǵysqa qatysqan bir ardager Oral arnaýly áleýmettik qyzmet kórsetý ortalyǵynda memleket qamqorlyǵynda bolǵandyqtan, oǵan atalǵan tólem qarastyrylmaǵan.

— Chernobyl apatynyń zardaptaryn joıý saldarynan múgedek bolǵan 165 adam, sondaı-aq tájik-aýǵan shekarasynda qyzmet etken 159 áskerı qyzmetshiniń árqaısysyna 100 myń teńgeden tólenip jatyr. Basqa radıatsııalyq apattar saldarynan múgedek bolǵan 101 adam da (100 myń teńgeden) umyt qalǵan joq. Aýǵanstandaǵy áskerı qımyldarǵa qatysqan jáne múgedek bolǵan 349 azamat 80 myń teńgeden alady. Al tyl eńbekkerleri sanatyna kiretin 982 adamǵa 50 myń teńgeden qarastyrylǵan, — dedi A.Tapıshev. 

Onyń aıtýynsha, Jeńis kúnine oraı qalada turatyn soǵys ardagerlerine syılyq sebetteri men arnaıy quttyqtaý hattaryna qosa «Uly Otan soǵysyndaǵy Jeńiske 80 jyl» mereıtoılyq medaldary tabys etiledi. Basqa da merekelik is-sharalar josparlanǵan.
Eske sala keteıik, budan buryn BQO turǵyny ákesiniń aǵasy jerlengen jerge baryp, taǵzym etkisi keletini jóninde aıtqanyn jazǵan bolatynbyz.