Oral qalasynda sý tasqynymen kúreske 2700-den astam adam jumyldyryldy
ORAL. KAZINFORM — Oral qalasynda sý tasqynymen kúreske 2700-den astam adam jumyldyrylyp, 500-ge jýyq arnaıy tehnıka tartyldy.
Oral qalasynyń ákimi Mırjan Satqanovtyń málim etkenindeı, sonyń ishinde 350 tehnıka – Qazaqstannyń ózge óńirlerinen kómekke kelgender.
Mırjan Munaıdarulynyń sózine qaraǵanda, Jaıyqtan keletin tasqyn sýdy bógeý úshin qalanyń qaýipti delingen 14 jerinde jumystar qaýyrt júrgizilýde.
«Uzyndyǵy 17 shaqyrymnan astam bógetter turǵyzylýda. Osy jumysty bir-eki kúnniń ishinde aıaqtamaqshymyz. Qalada 10 evakýatsııalyq pýnktte 2 100-den astam adam ornalastyrylǵan. Taǵy 3 myńnan astam oryn ázirlendi. Qazirgi tańda Derkól, Shaǵan ózenderinde sý deńgeıiniń kóterilýine baılanysty «Vıshenka», «Orbıta» saıajaılarynan turǵyndar kóshirilýde», dedi qala ákimi.
M.Satqanov sondaı-aq úıleri sýǵa ketip, qıyn jaǵdaıǵa tap bolǵan 1, 2-saıajaı qaýymdastyqtarynyń turǵyndarymen kezdesti.
Jaıyq ózeni jaıylmasynda ornalasqan saıajaılardan 50-ge jýyq adam sý tasqynyna qarsy qorǵanys úıindilerin salý, jer ýchaskelerine memlekettik aktiler berý jáne turǵyn úımen qamtamasyz etý máselelerin kóterdi.
Qala ákimi olardyń máselelerine qatysty jaýap berdi. Shahar basshysy qazirgi ýaqytta azamattardyń amandyǵy birinshi orynda ekenin atap ótti. Jergilikti atqarýshy organ men tótenshe jaǵdaı qyzmeti eldi mekenderdiń turǵyndary men olardyń úılerin sý tasqynynan qorǵaý úshin aýqymdy sharalar qabyldap jatqanyn jetkizdi. Turǵyndardyń barlyq máselesi eskerýsiz qalmaıtynyn, báriniń de sheshý joly zań aıasynda qarastyrylatynyn basa aıtty.
Oblys ortalyǵynda sý basyp jatqan basqa da saıajaı aýmaqtarynda qutqarý jumystary jalǵasýda.
Eske sala keteıik, budan buryn Oralda jaýyngerdiń jalǵyz ózi 30-ǵa jýyq adamdy tasqyn sýdan aman alyp shyqqanyn jazǵan bolatynbyz.
Sondaı-aq Oralda jeti balabaqsha ýaqytsha jabyldy.
Batys Qazaqstanda 2 300-ge jýyq adam evakýatsııalyq pýnktterde jatyr.
