Oral qalasynda skarlatınamen syrqattanǵandar sany 1,3 esege kóbeıgen

ORAL. KAZINFORM — Oral qalasynda skarlatına juqpasymen aýyrǵandar sany óskeni baıqalady.

Oral qalalyq sanıtarııalyq-epıdemıologııalyq baqylaý basqarmasynyń basshysy Gaýhar Dúıseǵalıevanyń málim etkenindeı, ótken jyly osy dertke 438 adam shaldyqqan. Bul — aldyńǵy jylǵydan (308) 1,3 esege kóp.

Onyń sózine qaraǵanda, aýyrǵandardyń 403-i — 14 jasqa deıingi balalar. 13-i — 15-17 jas aralyǵyndaǵylar. 22-si — eresekter.

— Skarlatına juqtyrǵandardyń 47-si — uıymdastyrylmaǵan balalar. Sonymen qatar, 232-si — balabaqsha tárbıelenýshileri, 131-i — mektep oqýshylary, 11-i — stýdent, 17-si — jumyssyzdar. Bul aýrýdy azaıtý maqsatynda balabaqshalar men mektepterde tańerteńgilik súzgi uıymdastyryldy. Aldyn alý sharalary júrgizilip, usynymdar berildi, — dedi G.Dúıseǵalıeva.

Basqarma basshysynyń aıtýynsha, ótken jyly jiti respıratorlyq vırýstyq ınfektsııany (JRVI) juqtyrǵan 142 242 adam tirkelip, atalmysh kórsetkish 1,2 esege tómendegen. Alaıda 184 adamnan tumaý anyqtalyp, bul derek 4,1 esege artyp ketken. 

— Medıtsınalyq uıymdarǵa kireberiste JRVI jáne tumaý belgileri bar adamdar súzgiden ótkizildi. Temperatýralyq jáne dezınfektsııalyq rejımderdiń saqtalýy qamtamasyz etildi. Oǵan qosa úı-jaılardyń sanıtarlyq jaǵdaıyna baqylaý kúsheıtildi, — dep qosty G.Dúıseǵalıeva.

Eske sala keteıik, budan buryn Batys Qazaqstanda JRVI juqtyrǵandar sany 87 myńnan asqanyn jazǵan bolatynbyz. 

Sondaı-aq BQO-da qyzylshamen aýyrǵan 60-qa jýyq adam aýrýhanaǵa jatqyzyldy. 

Oralda qyzylshamen aýyrǵan balalardyń barlyǵy ekpe almaǵan.