Oral qalasynda Shaǵan jáne Derkól ózenderi qaýipti deńgeıden asyp ketti
ORAL. KAZINFORM — Oral qalasynda Shaǵan jáne Derkól ózenderi qaýipti deńgeıden asyp ketti.
Mamandardyń baǵalaýynsha, Derkól ózeniniń gıdrobeketinde sý deńgeıi 708 (qaýipti deńgeıi – 600-650 sm), Shaǵanda 1 264 santımetrge, sondaı-aq Jaıyqta 583 santımetrge jetti.
Shaǵan jáne Derkól ózeni bir arnady tolyq toǵysty. Jaıyq ózeniniń kóterilýi jáne atalmysh eki ózenniń toǵysýy sýdyń aǵyspen ketpeı, syrtqa shyǵýyna alyp keldi.
Sonyń saldarynan ózen sýlary arnaǵa syımaı, Oral qalasyndaǵy Samal shaǵyn aýdanyna jaıyla bastady.
Qazirgi ýaqytta Samal shaǵyn aýdanynyń turǵyndaryn qaýipsiz jerlerge, evakýatsııalyq pýnktterge kóshirý júrgizilýde. Tótenshe jaǵdaılar men kommýnaldyq qyzmet mamandary jumys istep jatyr.
BQO ákimi Narıman Tóreǵalıev Samal shaǵyn aýdanyna baryp, jaǵdaıdy jiti baqylaýda ustap otyr. Tıisti jumystar júrgizilýde.
BQO TJ departamentiniń baspasóz qyzmetinen málim etkenindeı, qutqarýshylar Derkól kenti qazaq-túrik lıtseıi aýdany jáne «Samal 3» shaǵynaýdanynda aýlalardy qarap shyqty. Turǵyndardyń jartysynan kóbi týystaryna aldyn ala ketken. Qalǵandary evakýatsııadan bas tartty.
«Jaryq bar, tuıyqtalýdan qamtamasyz etildi. Evakýatsııalaýǵa BQO TJD jeke quramy, apattar medıtsınasy ortalyǵy, № 28237 áskerı bólimi, Ulttyq ulannyń № 5517 áskerı bólimi, aýmaqtyq qorǵanys arnaıy tehnıkalarmen qatysýda. Oblys jáne qala basshylary, TJD bastyǵy oqıǵa ornynda. Tótenshe jaǵdaılar, polıtsııa departamentterimen kezekshilik uıymdastyrylǵan. Turǵyndardan dúrbeleńge túspeýdi, tótenshe jaǵdaılar departamenti men jergilikti atqarýshy organdardyń usynystaryna sáıkes áreket etýdi jáne qajet bolǵan jaǵdaıda qaýipsiz jerlerge kóshýdi suraımyz. Kómek qajet jaǵdaıda 112 telefonyna habarlasýǵa bolady», – dedi departamenttiń baspasóz qyzmeti.
Sonymen qatar sý basý qaýpi tóngen Terekti aýdany Uzynkól aýylynan 705 adam kóshirilse, sonyń 230-y – balalar. Olardyń 685-i (223-i – balalar) týystaryna ketse, qalǵandary Terekti aýdany Podstepnyı aýylyndaǵy jáne Oral qalasyndaǵy mektepterge ornalastyryldy.
Eske sala keteıik, budan buryn Batys Qazaqstanda sýǵa ketken úıler sany 500-den asqanyn jazǵan bolatynbyz.
