BQO-da saıajaılar jaryqsyz qaldy
ORAL. KAZINFORM — Oral qalasy aýmaǵynda jeldiń kúsheıýi saldarynan elektr qýatyn berý boıynsha apattyq ajyratýlar tirkeldi.
«Batys Qazaqstan aımaqtyq elektr jelilik kompanııasy» JShS-dan málim etkenindeı, aǵash butaqtary elektr jelilerine qulap, qysqa tuıyqtalý boldy.
Osyǵan oraı Asan aýylynda 780, oblystyq aýrýhana aýdanynda 809, № 6 jáne Qonaev shaǵynaýdanynda 1 179, barlyǵy 2 768 tutynýshy, oǵan qosa Mıchýrın aýyly aýmaǵyndaǵy saıajaılar elektr jaryǵynsyz qaldy.
- Qazirgi ýaqytta apattyq brıgadalarmen áýe jelileri boıyndaǵy aǵash butaqtaryn kesý jáne tazalaý jumystary atqarylyp jatyr. Abonentterge elektr jaryǵyn múmkindiginshe qysqa merzimde berý úshin qalpyna keltirý sharalary júrgizilip jatyr, - dep habarlady vedomstvodan.
Sonymen qatar «Batys sý arnasy» JShS aptap ystyqqa baılanysty aýyz sýdy tutyný kólemi aıtarlyqtaı artqanyn jetkizdi. Sonyń saldarynan sý berý júıesine túsetin júkteme ulǵaıdy. Bul qalanyń jekelegen aýdandarynda, kópqabatty úılerdiń joǵarǵy qabattarynda sý qysymynyń ýaqytsha tómendeýine ákelýi múmkin.
Mekeme turǵyndardan aýyz sýdy qajettilikterge qatysy joq maqsattarǵa ýaqytsha paıdalanýdan bas tartýdy usyndy. Atap aıtqanda, kúndizgi ýaqytta baý-baqsha, kógaldar men jasyl jelekti sýarý, jeke turǵyn úı ıeleriniń aýmaǵynda avtokólik jýý, basseınder men syıymdylyqtardy toltyrý jáne basqa maqsatqa sýdy qoldanbaýǵa ótinish jasaldy.
Oral qalasynda búgin de kún qatty ysyp, temperatýra tili 40 gradýsqa jaqyndady.
Eske sala keteıik, budan buryn Batys Qazaqstanda ormandaǵy órtti sóndirýge tikushaq tartylǵanyn jazǵan edik.
