Oral qalasynda saıajaı turǵyndaryna taǵy da 6 páter berildi
ORAL. KAZINFORM – Memleket basshysy sý tasqynynan zardap shekken turǵyndarǵa tıisti kómek kórsetýdi tapsyrǵan bolatyn. Oral qalasynda sý tasqyny saldarynan jalǵyz baspanasy jaramsyz dep tanylǵan taǵy 6 saıajaı turǵyny baspanaly boldy. Jańa páterler demeýshiler qarjysyna satyp alyndy.
BQO ákimdiginiń baspasóz qyzmetiniń málimetinshe, Úkimet basshysynyń tapsyrmasyna sáıkes, qarjylyq uıymdar men demeýshiler óńirdegi zardap shekken turǵyndarǵa qol ushyn sozyp, kómegin berip jatyr.
Oraldyq Qaırat Shakırovtyń saıajaıdaǵy jalǵyz baspanasy sýǵa ketip, jaramsyz dep tanylǵan. Búgin ol jańa páterine kirdi.
«Sý tasqynynan keıin evakýatsııalyq pýnktte turdyq. Tezirek baspanaly bolǵymyz keldi. Búgin armanymyzǵa qol jetkizip otyrmyz. Memleket basshysyna alǵysymyzdy bildiremiz», - dedi ol.
Osylaısha Oral qalasynda jalǵyz baspanasy bolyp esepteletin, úıleri apatty dep tanylǵan saıajaı turǵyndaryna aldaǵy ýaqytta jańa úıler satyp alý jáne salý boıynsha jumystar júrgizilip jatyr.
