Oral qalasynda sanıtarlyq talap buzylǵan 16 nysanǵa 3 mln-ǵa jýyq teńge aıyppul salyndy

ORAL. KAZINFORM – Oral qalalyq sanıtarııalyq-epıdemıologııalyq baqylaý basqarmasyna túsken ótinishter sany 1,1 esege kóbeıip otyr.

Basqarma basshysy Gaýhar Dúıseǵalıevanyń óńirlik kommýnıkatsııalar qyzmeti alańynda ótken brıfıngte málim etkenindeı, bıylǵy segiz aıda jeke adamdardan 211, zańdy tulǵalardan 38, barlyǵy 249 (ótken jyly osy merzimde – 216) ótinish túsken.

Onyń sózine qaraǵanda, ótinishterdiń basym bóligi aýmaqty abattandyrý jáne tazalyq saqtaý, qoqys konteınerlerin ornalastyrý, tynyshtyqty buzýǵa (103), tamaq ónimderiniń qaýipsizdigi men sapasyna (97) qatysty bolyp otyr.

- Qaraý nátıjeleri boıynsha 184 sheshim qabyldandy. Sonyń ishinde jospardan tys 25 tekseris ashylyp, 16 nysanda sanıtarlyq talaptardyń buzylǵany anyqtaldy. Osy 16 nysan 2 mln 988,320 myń teńge kóleminde aıyppul arqalady. Sonymen qatar tekseris ashylmaı, quqyq qorǵaý organdarynan kelip túsken materıaldar negizinde QR Ákimshilik quqyq buzýshylyq týraly kodeksiniń 802-babyna sáıkes 334 220 teńgege 7 ákimshilik aıyppul salyndy, - dedi G.Dúıseǵalıeva.

Basqarma basshysynyń aıtýynsha, ákimshilik akt QR Ákimshilik rásimdik-protsestik kodeksi boıynsha qabyldanady. Osy kodekstiń 70, 89-baptaryna sáıkes 58 ótinish toqtatyldy. Bul – ótinishterdiń 23 paıyzy. Turǵyndar qysqartylǵan ótinishter boıynsha dáleldi qujattar jınasa, basqarmaǵa qaıta júgine alady.

Eske sala keteıik, budan buryn Batys Qazaqstanda kómilgen sibir jarasynan qaýip bar ma, sony jazǵan edik.