Oral qalasynda orman alqaby otqa orandy
ORAL. KAZINFORM — Batys Qazaqstan oblysynda jyl basynan bergi alǵashqy orman órti tirkeldi.
BQO tabıǵı resýrstar jáne tabıǵat paıdalanýdy retteý basqarmasynan alynǵan málimetke qaraǵanda, Oral orman mekemesiniń aýmaǵynda Han toǵaıy mańynda 13 mamyr kúni órt boldy.
Aldyn ala málimet boıynsha «tilsiz jaý» 2,7 gektar jerdi qamtyǵan. Ormannyń janyp jatqany jóninde aqparat saǵat 11.40-ta túsken.
Órtti aýyzdyqtaýǵa 27 adam, 10 tehnıka jumyldyrylyp, sol kúni sóndirildi.
Basqarma basshysynyń orynbasary Darhan Zakarınniń málim etkenindeı, óńirde memlekettik orman qory jeriniń jalpy aýdany 224 699 gektar bolsa, sonyń 88 762 gektary toǵaımen kómkerilgen.
Onyń sózine qaraǵanda, oblystaǵy 8 orman sharýashylyǵy mekemesinde 10 orman órt stantsııasy jumys jasaıdy. 2025 jyly Aqjaıyq, Bórli, Taıpaq, Oral jáne ıAnvartsev orman mekemeleriniń aýmaǵynda jalpy aýdany 134,08 gektar 15 orman órti tirkeldi. Onyń ishinde ormanmen qamtylǵan aýmaqtyń kólemi – 43,9 gektar.
Orman órtteriniń aldyn alý jáne olardy erte anyqtaý maqsatynda orman sharýashylyǵy mekemelerinde 11 órt baqylaý munarasy ornatylǵan. Sonymen qatar 2024 jyldan bastap osyndaı mekemelerde «Lesohranıtel» orman órtin erte anyqtaý júıesiniń 10 beınebaqylaý kamerasy jumys isteıdi.
- Bıyl oblys aýmaǵynda ormandy áýeden júıeli túrde baqylaý arqyly órtti der kezinde anyqtaý, orman zańnamasyn buzýshylyqtardy aıqyndaý jáne olardyń aldyn alý maqsatynda «Qazavıaormanqorǵaý» RMQK ashyldy. Atalǵan mekeme órt qaýiptilik klasyna baılanysty avıatsııalyq patrýldeý jumystaryn júrgizip, qajet bolǵan jaǵdaıda orman órtterin sóndirýge qatysady. Mekemede 7 adam qyzmet atqarady jáne As-350 Eýrokopter áýe kemesimen jabdyqtalǵan, - dedi D.Zakarın.
Eske sala keteıik, budan buryn BQO-da jeti dala órti tirkelgenin jazǵan edik.
