Oral qalasynda las sý aǵyp jatyr — ákimdik jaýap berdi

ORAL. KAZINFORM — Oral qalasynda «Omega» zaýyty aýdanynda las sýdyń aǵyp jatqany jóninde áleýmettik jelide beınejazba taraldy.

Qala turǵyny osy tustan kúnde ótetinin aıtady. 

Onyń sózine qaraǵanda, aınalma jol tusynda «Samal-1» shaǵynaýdany mańynda aqqan káriz sýy kún saıyn kóbeıip jatyr. 

— Las sý jańadan salynyp jatqan botanıkalyq baqqa jetip qaldy. Kóp uzamaı «Samal-1» shaǵynaýdanyn basady. Iistiń kúshtiligi sondaı, bul jerde tynys alý múmkin emes, — deıdi qala turǵyny.

Osyǵan oraı Kazinform tilshisiniń saýalyna Oral qalasy ákimdigi jaýap berdi. 

Ákimdik málimetine qaraǵanda, qazirgi ýaqytta 18A kárizdik-sorǵy stantsııasynyń káriz júıesine turmystyq qaldyqtar men qoqystardyń shamadan tys túsýi tirkelip otyr. 
Sonyń saldarynan sorǵy jabdyqtary bitelip, eki sorǵy isten shyqqan.

Káriz sýlaryn ishinara aıdaý toqtatylǵandyqtan, qubyrdaǵy sý deńgeıi kóterilip, jaqyn mańdaǵy turǵyn aýdandarda káriz ıisi paıda boldy.

23 tamyzdaǵy málimet boıynsha jańa sorǵy jabdyǵy ornatyldy. Búgingi tańda káriz sýynyń deńgeıi normatıvtik kórsetkishterge sáıkes, káriz qudyqtarynan tógilý faktileri anyqtalmaǵan.

— Kúni búgin 18A kárizdik-sorǵy stantsııasy qalypty rejımde jumys jasap tur. Kásiporyn qyzmetkerleri táýlik boıy kezekshilik júrgizip, káriz júıesindegi sý deńgeıine jáne jabdyqtardyń tehnıkalyq jaǵdaıyna turaqty baqylaý jasaýda. Jaqyn arada sanıtarııalyq jaǵdaıdy jaqsartý maqsatynda káriz kollektory mańyndaǵy ýchaskelerden sýdy sorý jumystary uıymdastyrylmaq. Sonymen qatar turǵyndar arasynda qoqys pen turmystyq qatty qaldyqtardy káriz jelisine tastaýǵa bolmaıtyny jóninde túsindirý jumystary júrgizilip jatyr, — dep habarlady Oral qalasy ákimdiginen.

Eske sala keteıik, budan buryn Oralda jylý qubyrynyń jóndelýine baılanysty 11 mekeme ystyq sýdan ajyratylǵanyn jazǵan edik.