Oral qalasynda Qurban aıt kezinde mal úsh arnaıy orynda shalynady

ORAL. KAZINFORM – Batys Qazaqstan oblysynda Qurban aıt merekesi qarsańynda qurban shalýǵa arnalǵan arnaıy oryndar anyqtaldy.

Batys Qazaqstan oblysynyń bas ımamy Samat Álibaevtyń óńirlik kommýnıkatsııalar qyzmeti alańynda ótken brıfıngte málim etkenindeı, qasıetti meıramǵa oraı óńirde daıyndyq jumystary júrgizildi.

Samat Qanatqalıulynyń sózine qaraǵanda, qurbandyq shalý úshin sanıtarlyq-veterınarlyq talaptarǵa saı keletin úsh arnaıy oryn belgilendi. Olar – Oral qalasyndaǵy «El yrysy» bazary, «Kýbleı» mal soıý orny jáne «Batys Adal-Et» soıý kesheni. 

- Shalǵaıdaǵy nemese issapardaǵy azamattarǵa qolaıly bolý úshin QURBAN2025.kz resmı saıty arqyly onlaın qurban shalýǵa múmkindik jasalǵan. Qurban aıttyń birinshi kúni – 6 maýsymda Batys Qazaqstan oblysy boıynsha tańǵy saǵat 06.30-da Aıt namazy oqylady. Qurban aıt qurmetine qazaq kúresinen «Jamaǵat barysy» jarysy ótkiziledi. Oǵan qosa Aıt namazynan keıin ortalyq meshit aýlasynda arqan tartys, gir tasyn kóterý sııaqty ulttyq oıyndarǵa kezek beriledi, - dedi S.Álibaev. 

BQO din isteri basqarmasynyń bólim basshysy Erbolat Isan mereke kúnderi qoǵamdyq tártip pen qaýipsizdikti saqtaý maqsatynda barlyq meshitte jergilikti polıtsııa, tótenshe jaǵdaılar, jedel járdem jáne ishki saıasat qyzmetteri kezekshilik atqaratynyn atap ótti. Sonymen qatar mal soıý oryndarynda sanıtarlyq tazalyq, órt qaýipsizdigi jáne qurbandyq shalý tártibine basa mán beriledi.

- QMDB-nyń jergilikti jerlerdegi qurylymdary arqyly turǵyndar arasynda Qurban aıt kezindegi rásimderde ysyrapshyldyqqa jol bermeý, mal soıý barysyn foto-vıdeoǵa túsirip, áleýmettik jelilerde taratýdan tyıylý, Aıt meıramyna jaıylatyn dastarhan máziriniń qarapaıym bolýy sııaqty usynymdar boıynsha aqparattyq-túsindirý jumystary júrgizilýde. Aıt kezinde merekelik mádenı is-sharalardy ótkizýge qoldaý kórsetiledi, - dedi E.Isan.

Eske sala keteıik, budan buryn Shymkentte Qurban aıt merekesine oraı mal soıýǵa arnalǵan resmı oryndar belgilengenin jazǵan bolatynbyz.