Oral qalasynda kóshe joldary qardan qalaı tazartylmaqshy
ORAL. KAZINFORM – Oral qalasynda avtomobıl joldarynyń jalpy uzyndyǵy 690,3 kılometr bolsa, trotýar – 236 km.
Oral qalasy ákimdiginen málim etkenindeı, buǵan Krýgloozernyı, Zachagan, Derkól jáne Jelaev aýyldyq okrýgindegi kóshe joldary men trotýar da kiredi.
«Jaıyq Taza Qala»» JShS qala aýmaǵy men Zachagan, Derkól, Krýgloozernyı kentteriniń kóshe joldaryn qysqy mezgilde kútip ustaýdy qamtamasyz etedi. Al Jelaev aýyldyq okrýgi «Maqsotov» jeke kásipkerligimen 2023-2024 jyldarǵa kelisimshart jasasqan.
«Jaıyq Taza Qala» JShS mekemesinde 750 adam jumys isteıdi. Qardy kúrekpen tazartatyn 32 brıgada bolsa, kommýnaldyq jáne jol tehnıkasynyń jalpy sany – 190. GPS qurylǵysy kásiporynnyń barlyq tehnıkasyna qosylǵan.
Bıyl jańadan 13 tehnıka satyp alyndy. Qysqy merzimge 20 myń tonna qum-tuz qospasy daıyn.
Al «Maqsotov» JK-da 10 adam eńbek etse, 19 kommýnaldyq jáne jol tehnıkasy bar.
Qala ákimdiginiń aqparaty boıynsha qys mezgilinde joldy qardan tazartý jáne taıǵaqtyqty qysqa merzimde joıýǵa basa kóńil bólinedi. Birinshi kezekte qozǵalys qaýipsizdigin qamtamasyz etetin is-sharalar oryndalady. Atap aıtqanda, jol jabyndaryn kóktaıǵaqqa qarsy materıaldarmen óńdeý, qardy jınaý, tyǵyzdalǵan qar men muzdy syndyrý, qardy úıindilerge jyljytý, ony arnaıy kólikterge tıep, belgilengen oryndarǵa shyǵarý jumystary atqarylady.
Qala kóshelerinen qar tórt polıgonǵa (ortalyqtan 9 km qashyqtyqta ornalasqan «Asan», Zachagan kentindegi «Balaýsa», sondaı-aq «Úlken kólemdi qaldyqtarǵa arnalǵan» jáne «Teleortalyq» polıgony) jetkiziledi.
«Avtomobıl joldaryn qardan tazartý birneshe baǵytta júrgiziledi. Negizgi baǵyt qalanyń ortalyq bóligin qamtıdy. Uzyndyǵy 95 km. Sodan keıin qalanyń soltústik-shyǵys, ortalyq-shyǵys, shyǵys bólikteri, Zachagan, Derkól kentteri belgilengen ýaqytta qardan tazartylady», dep habarlady vedomstvodan.
«Ádette qalanyń ortalyq bóligi, sonymen qatar avtobýs júretin kóshelerge mán beriledi. Alaıda shahardyń shet jaqtary umyt qalyp jatady. Qar jentektelip, tyǵyzdalyp qalǵannan keıin ol joldarmen júrý qııamet-qaıymǵa aınalady. Bylaıǵy kezde keı kóshede qatty turmystyq qaldyqtar shashylyp jatady, óıtkeni ıt kóp, osynyń bári kedergi», dedi Oral qalasynyń turǵyny, júrgizýshi Jarqyn Maǵzomov.
Eske sala keteıik, budan buryn Oral qalasy jylytý maýsymyna qanshalyqty daıyn ekendigi týraly jazǵan bolatynbyz.
