Oral qalasynda qos qabatty turǵyn úı órtendi

ORAL. KAZINFORM — Oral qalasynda 4 páterlik eki qabatty aǵash úı otqa orandy.

BQO TJ departamentiniń baspasóz qyzmetinen málim etkenindeı, Samar kóshesindegi úıdiń órtengeni jóninde 23 qarasha kúni saǵat 20.29-da habar túsken.

TJM kúshteri kelgen kezde shatyrdyń jáne ekinshi qabattyń bir bóligin órt sharpyǵany anyqtaldy.

Órt sóndirýshilerdiń úılesimdi ári jedel áreketteriniń arqasynda jalynnyń taralýy der kezinde toqtatylyp, onyń ekinshi qabattyń qalǵan bóligi jáne birinshi qabatqa ótip ketýine jol berilmedi.

TJM bólimsheleri kelgenge deıin turǵyndar páterlerin ózderi tastap shyqqan.

- Turǵyn úıdiń jalpy aýmaǵy 400 sharshy metr bolsa, aldyn ala boljam boıynsha sonyń 150 sharshy metri órtengen. «Tilsiz jaý» saǵat 21.06-da oqshaýlanyp, 21.24-te tolyqtaı sóndirildi. Oqıǵa ornynda TJD basshylyǵy bolyp, jeke quramnan 32 adam 9 tehnıkamen jumys istedi. Sondaı-aq «QazTransGazAımaq» AQ Batys Qazaqstan óndiristik fılıaly jáne jergilikti atqarýshy organdardyń ókilderi keldi, - dep habarlady vedomstvodan.

Eske sala keteıik, budan buryn Oralda sút kombınatynyń ǵımaraty órtengenin jazǵan edik.