Oral qalasynda kómirdi qaıdan alýǵa bolady

ORAL. KAZINFORM — Oral qalasynda kómir satýmen aınalysatyn jalǵyz qoıma jumys istep tur.

BQO energetıka jáne turǵyn úı-kommýnaldyq sharýashylyq basqarmasynan málim etkenindeı, óńirdegi birden-bir jetkizýshi — «STONEGRAD» kompanııasy qala turǵyndaryn kómirmen qamtamasyz etedi.

Kompanııa Oral qalasyna qarasty Jelaev aýylyndaǵy «Dılta» bazasynda ornalasqan. Qoıma qajetti ınfraqurylymmen jáne tıeý-túsirý tehnıkasymen jabdyqtalǵan. Mekemeniń qaladaǵy mekenjaıy — E.Oraqbaev kóshesi 1/1v.

Basqarma málimetine qaraǵanda, kómirdiń bir tonnasy orta eseppen 36 myń teńgeden bastalady. Bul somaǵa jetkizý quny kirmeıdi.

Batys Qazaqstan oblysy tabıǵı gazben 99,7 paıyzǵa qamtylǵany belgili.

— Oblys aýmaǵynda kómir alýshylar az. 12 aýdannyń tek tórteýinde ǵana kómirmen jylytylatyn áleýmettik nysandar bar. Olar — Báıterek, Kaztalov, Tasqala jáne Terekti aýdandary. Qazirgi tańda 216 tonna kómir otyny tolyqtaı jetkizildi, — dep habarlady vedomstvodan.

Eske sala keteıik, budan buryn Batys Qazaqstanda qandaı jylý nysandary jańartylyp jatqanyn jazǵan edik. 

Sondaı-aq elordada kómirdi qaıdan jáne qandaı baǵaǵa alýǵa bolatyny jóninde habarlandy.