Oral qalasynda kólik júktemesin azaıtatyn jańa kópir salynady
ORAL. KAZINFORM — Oral qalasynyń ortalyǵy men «Aqjaıyq» shaǵynaýdanyn baılanystyratyn jańa kópir men oramishilik joldardyń qurylysyna daıyndyq bastaldy, dep habarlaıdy BQO ákiminiń baspasóz qyzmeti.
Saltanatty rásimde keleshekke joldaýy bar ýaqyt kapsýlasy salyndy.
Oblys ákimi Narıman Tóreǵalıev jobanyń strategııalyq mańyzyna toqtaldy.
— «Aqjaıyq» shaǵynaýdany — 70 myń adamǵa eseptelgen jańa zamanaýı turǵyn alaby. Munda barlyq qajetti ınjenerlik ınfraqurylym tartylǵan. Sondyqtan kópir men avtojol salý — jaı ǵana qolaılylyq máselesi emes, bul strategııalyq mańyzdy mindet. Bıyldyń ózinde merdiger kompanııa jumysqa kirisedi, qurylysty 2028 jyly aıaqtaý josparlanǵan, — dedi Narıman Tóreǵalıev.
Búgingi tańda Zachagan kentinde 80 myńnan astam adam turady. Qala ortalyǵyna kólik qatynasy jalǵyz «Dınamo» ótkeline táýeldi. Jańa kópir paıdalanýǵa berilgende júkteme azaıyp, keptelis máselesi tolyq sheshilmek. Bolashaqta «Aqjaıyq» shaǵynaýdanynda da halyq sany artatynyn eskersek, bul magıstral qalanyń eń mańyzdy kólik kúretamyryna aınalady.
Tehnıkalyq sıpattama boıynsha kópirge aparatyn I sanatty joldyń uzyndyǵy 4 shaqyrymdy, al ótkeldiń uzyndyǵy 220 metrdi quraıdy. Mamandardyń esebinshe, bul nysan táýligine 30 myńǵa jýyq kólikti ótkizýge qaýqarly. Sonymen qatar, bul jol «Aqtóbe-Oral-RF shekarasy» trassasyna tikeleı shyǵýǵa múmkindik berip, óńirdiń tranzıttik áleýetin arttyrady.
Qazirgi ýaqytta «Aqjaıyq» shaǵynaýdanynda úsh myńnan astam adam qonystanǵan. Keleshekte munda ondaǵan kópqabatty turǵyn úıler men 60-qa jýyq áleýmettik nysan boı kóteredi.
