Oral qalasynda qatty jelge baılanysty ushaqtar keshigip jatyr

ORAL. KAZINFORM - Oral qalasynda qatty jelge baılanysty ushaqtar keshigip jatyr.

«Oral halyqaralyq áýejaıy» JShS baspasóz qyzmetinen málim etkenindeı, ekpini sekýndyna 20 metrge jetken kúshti jeldiń saldarynan 6 aqpan kúni Almaty-Oral baǵytynda kele jatqan Fly Arystan áýe kompanııasy 7 165 ushaǵynyń komandıri Atyraý qalasyndaǵy qosalqy áýe aılaǵyna ushý týraly sheshim qabyldaǵan. Ushaq Oralǵa búgin kelmekshi.

Sondaı-aq osyndaı sebeppen Air Astana áýe kompanııasynyń 319/937 Maındaǵy Franfýrt-Astana-Oral reısi jáne Qazaq air áýe kompanııasynyń 421 Atyraý-Oral reısi keshigip jatyr. 

«Ushý-qoný jolaǵy qar men muzdan tolyq tazartylǵan. Áýe kemeleriniń ushýy men qonýyna daıyn. Reıster tek qatty jelge baılanysty keshigip jatyr», - dep habarlady vedomstvodan.