Oral qalasynda er adam tasqyn sýmen aǵyp kete jazdady
ORAL. KAZINFORM — Oral qalasynda er adam tasqyn sýmen aǵyp kete jazdady.
BQO polıtsııa departamentiniń qyzmetkeri, polıtsııa kishi serjanty Ámirjan Birlesovtiń málim etkenindeı, oqıǵa 21 sáýir kúni shamamen saǵat 12.30-da Jaıyq ózeni jaıylmalarynda ornalasqan 1, 2, 3-saıajaı aýmaǵynda bolǵan.
«Jasandy bógetti tasqyn sý buzyp ótkennen keıin bir er adamnyń aǵyp bara jatqanyn baıqadym. Ulttyq ulan, eriktiler, TJ qyzmetkerleri jáne sol mańda bolǵan azamattar maǵan kómektesti. Sóıtip er adamdy qutqaryp qaldyq» dedi Á.Birlesov.
BQO polıtsııa departamentiniń bastyǵy Arman Orazalıevtiń naqtylaýynsha, áleýmettik jeliler men túrli messendjerlerde sý basqan aýmaqtan bir adamnyń qutqarylǵany týraly beınejazba tarady.
Onyń sózine qaraǵanda, beınejazba avtory úkimetten eshqandaı kómek joq ekenin aıtyp qaldy.
Bul shyndyqqa janaspaıdy.
Óıtkeni sýǵa kete jazdaǵan turǵyndy aman alyp qalǵan azamat — polıtsııa kishi serjanty Ámirjan Birlesov.
Oǵan Ulttyq ulan jaýyngerleri, eriktiler jáne TJ departamentiniń qyzmetkerleri kómekke keldi.
«Qurmetti turǵyndar! QR Ákimshilik quqyq buzý týraly kodeksiniń 667-babyna sáıkes quqyq qorǵaý organy nemese arnaýly memlekettik organ qyzmetkeriniń zańdy ókimine nemese talabyna baǵynbaý zańǵa qaıshy ekenin esterińizge salamyz. Mundaı quqyqbuzýshylyq jasaǵan adamǵa otyz aılyq eseptik kórsetkish mólsherinde aıyppul salynady nemese on bes táýlikke deıingi merzimge ákimshilik qamaqqa alynady. Tasqyn qaýpi tóngen kúnnen bastap kúni búginge deıin polıtsııa, quqyq qorǵaý qyzmetkerleri, áskerıler, Ulttyq ulan sarbazdary jáne tótenshelikter sý basý qaýpi bar aımaqtardaǵy azamattarǵa birneshe ret eskertý jasady, sýǵa kete jazdaǵan adamǵa da eskertilgen bolatyn. Ózińizdiń jáne týystaryńyzdyń ómirin qaterge tikpeńiz» dedi A.Orazalıev.
Eske sala keteıik, budan buryn Oral qalasynda Jaıyqtaǵy sý deńgeıi qaýipti shekten asyp ketkenin jazǵan bolatynbyz.
Oral qalasy tóńireginde saıajaılar sýǵa ketip jatyr.
Oral qalasynda sý basqan saıajaılardan 4 adam qutqaryldy.
