Oral qalasynda eki mekenjaıda qubyr jaryldy
ORAL. KAZINFORM — Oral qalasynda eki mekenjaıda qubyr jarylýyna baılanysty ystyq sý berý toqtatyldy.
«Jaıyqjylýqýat» AQ-dan málim etkenindeı, Zachagan kentinde M.Móńkeuly 97/3 jáne 97/4-mekenjaıynda dıametri 108 mm qubyr jaryldy.
Sondaı-aq M.Móńkeuly 101-mekenjaıynda dıametri 76 mm qubyr isten shyqty.
— Apatqa baılanysty atalǵan mekenjaılarda erteńge deıin ystyq sý berilmeıdi, — dep habarlady vedomstvodan.
«Jaıyqjylýqýat» AQ-dan túsken málimetke qaraǵanda, sonymen qatar jylý júıelerine kúrdeli jóndeý júrgizilýine baılanysty Partızan kóshesi 88 jáne Isataı batyr kóshesi 71/1-mekenjaıynda (sporttyq alpınızm mektebi) 30 shilde men 22 tamyz aralyǵynda ystyq sý berý toqtatylady.
Munda dıametri 159 mm uzyndyǵy 210 metr qubyr jóndeletin bolady.
Eske sala keteıik, budan buryn Oralda qubyrdaǵy apat saldarynan birneshe shaǵynaýdannyń salqyn sýsyz qalǵanyn jazǵan edik.