Oral qalasynda burshaq jaýyp, kún salqyndady
ORAL. KAZINFORM — Batys Qazaqstan oblysynda keshe keshten beri aýa raıy ózgerdi.
Túnde kún salqyndasa, túske deıin Oralda burshaq jaýyp, qar ushqyndady. Sonymen qatar jel de kúsheıip tur.
BQO TJ departamentiniń baspasóz qyzmetinen málim etkenindeı, túnde temperatýra 2 gradýsqa deıin kúrt tómendedi.
«Qazgıdromet» RMK málimetine qaraǵanda, 29 sáýir kúni túnde jáne tańerteń Batys Qazaqstan oblysynyń soltústigi men shyǵysynda, sondaı-aq Oralda tuman bolýy yqtımal.
Osyǵan baılanysty BQO TJ departamenti taǵy da eskertý jarııalady.
Burshaqtyń jaýýy baý-baqsha ósiretin turǵyndardy da alańdatyp otyr.
Oraldyq belgili baǵban Qaırat Kárimovtiń aıtýynsha, aýa raıynyń qubylmaly bolýy kóktemge tán jaǵdaı bolyp esepteledi.
- «Besqonaq», sol sekildi aldaǵy mamyr aıynda quralaı salqyny bolady. Mundaı aýa raıy ońtústikte ósetin suryptar úshin óte qıyn. Mysaly, júzimdi jabýǵa týra keledi. Al bizdiń tabıǵatqa beıimdelgen alma aǵashtaryna pálendeı qaýip joq. Tek aralar ushpaı, tozańdaný bolmaı, ónimdilik tómendeıdi. Al úskirik soqsa, alma aǵashynyń gúli úsip ketedi. Bul da ónimdilikke áser etedi, - dedi Q.Kárimov.
Eske sala keteıik, budan buryn Batys Qazaqstanda jaýǵan qar qyzǵaldaqty basyp qalǵanyn jazǵan bolatynbyz.