Oralda birneshe nysan men 5 kópqabatty úıdiń jertólesine sý kirdi
ORAL. KAZINFORM — Oral qalasynda 5 kópqabatty úıdiń jertólesine men birneshe nysanǵa sý kirdi.
BQO TJ departamentiniń baspasóz qyzmetinen málim etkenindeı, 26 naýryz kúni Oral qalasy aýmaǵy men oblystyń toǵyz aýdanynda qar erip, oǵan qosa bir táýlikte aılyq norma (25,6 mm) kóleminde jaýyn-shashyn tústi.
«Saldarynan Oralda qala ákimdigi, J.Dosmuhamedov kóshesi 16-mekenjaıynda ornalasqan qazynashylyq departamenti jáne temirjol vokzaly ǵımarattarynyń, sondaı-aq 5 kópqabatty úıdiń jertólesine sý kirdi. Oǵan qosa 298 turǵyn úıdiń aýlalary men aýmaqtarynan barlyǵy 131 616 tekshe metr sý soryldy. Bul jumystardy 222 tehnıka, 153 motopompanyń kúshimen atqarýǵa tótenshe jaǵdaılar, jergilikti atqarýshy organdar, 5517-áskerı bólim, 99250-áskerı bólim jaýyngerleri, barlyǵy 990 adam atsalysty. Sondaı-aq qaýipti tustarǵa ınertti materıaldarmen 5730 dana qap salyndy», - dep habarlady vedomstvodan.
QR Ulttyq ulany «Batys» óńirlik qolbasshylyǵy baspasóz qyzmetiniń naqtylaýynsha, sý tasqynynyń aldyn alýǵa 100-ge jýyq jaýynger qatysty.
«Mundaı is-sharalarǵa belsene atsalysý bizdiń azamattyq mindetimiz degim keledi. Biz, Ulttyq ulan jaýyngerleri qandaı jaǵdaı bolmasyn halyqqa kómektesip, kez kelgen qıyndyqtyń aldyn alýǵa óz kúsh-jigerimizdi jumsaımyz. Kúni búgin 5517-áskerı bólim qyzmetkerleri sý tasqynyna tosqaýyl qoıý jumysynda júr», - dedi 5517-áskerı bólimniń batalon komandıri, maıor Jasulan Kórpeshov.
«Batys sý arnasy» JShS kárizdik sorǵy stansalarynyń apatty jaǵdaıyna, ǵımarattar men aýmaqtardy sý basýyna jol bermeý úshin Oral qalasynda 27 naýryz kúni saǵat 11.00-den bastap salqyn sý berý tolyq toqtatylatynyn habarlady. Sý shamamen 17.00-de qaıta berilmek.
Eske sala keteıik, budan buryn Oral qalasynda úılerge qar sýy kirip jatqanyn jazǵan bolatynbyz. Sondaı-aq Batys Qazaqstanda 500-den astam úı men 15 kásiporyn gazsyz qaldy.
