Oral qalasynda bir apta boıy ystyq sý bolmaıdy
ORAL. KAZINFORM — Kúzgi-qysqy jylytý maýsymyna daıyndyq jumystary aıasynda 7–13 qyrkúıek aralyǵynda «Jaıyqjylýqýat» AQ-nyń Oral jylý-qýat ortalyǵyndaǵy jylý óndirýshi jabdyqtary tolyq toqtatylady.
«Jaıyqjylýqýat» AQ-dan málim etkenindeı, osyǵan baılanysty atalǵan kezeńde, ıaǵnı bir apta boıy Oral qalasy tutynýshylaryna jylý-qýat ortalyǵynan ystyq sý berý ýaqytsha toqtatylady.
— Jumysta jylý-qýat ortalyǵynyń negizgi jáne qosalqy jabdyqtaryn tehnıkalyq dıagnostıkalaý, tekserý, jóndeý jáne jylý jelilerine gıdravlıkalyq synaq júrgizý maqsatynda júzege asyrylady, — dep habarlady vedomstvodan.
Sonymen qatar qazirgi kezde Ábilqaıyr han dańǵyly boıynda «Aılýna» kafesine qarama-qarsy ornalasqan dıametri 900 mm káriz kollektoryndaǵy káriz qudyǵynyń opyrylyp túsýine baılanysty qalpyna keltirý jumystary júrgizilip jatyr.
«Batys sý arnasy» JShS málimetine qaraǵanda, atalǵan kollektor Q.Mıhanova, S. Tıýlenın, N.Gastello kósheleri jáne Ábilqaıyr dańǵyly boıyndaǵy turǵyn úıler men shaǵyn jáne orta bıznes nysandaryna qyzmet kórsetedi.
Jol qozǵalysyna qatysýshylardyń qaýipsizdigin qamtamasyz etý maqsatynda Ábilqaıyr han dańǵylynyń Jeltoqsan kóshesinen S. Tıýlenın kóshesine deıingi ýchaskesi kólik qozǵalysy úshin ýaqytsha jabyldy.
Oral qalasy ákimdiginiń málimeti boıynsha kollektordaǵy apatqa baılanysty qalpyna keltirý jumystaryn osy aptanyń sońyna deıin aıaqtaý kózdelip otyr.
Ábilqaıyr han dańǵyly boıyndaǵy bóliktiń jabylýyna baılanysty qalada 11 avtobýstyń baǵyttary ózgertildi.
Eske sala keteıik, budan buryn Oralda qubyrda apat bolyp, úıler men saýda nysandary sýsyz qalǵanyn jazǵan edik.
