Oral qalasynda baý-baqsha seriktestiginde taǵy da shý shyqty
ORAL. KAZINFORM – Oral qalasyndaǵy «Zachaganskıı» baý-baqsha seriktestiginiń turǵyndary 3 aqpan kúni keshkisin aınalma joldy jaýyp tastady.
Belgili bolǵanyndaı, másele turǵyndar elektr qýatyna qaryzdar bolǵandyqtan, jaryqty aıyryp tastaýdan týyndaǵan.
Zachagan kentiniń ákimi Aqqalı Áýbekerovtiń málim etkenindeı, turǵyndar jaýyp tastaǵan jol polıtsııanyń kómegimen ashyldy. Jaryq ta qosyldy.
- Qazirgi tańda atalmysh baý-baqsha seriktestiginiń turǵyndary «Batys Qazaqstan aımaqtyq elektr jelilik kompanııasy» JShS-yna 71 mln teńge qaryzdar bolyp qalǵan. On kúnniń ishinde atalǵan mekeme osymen elektr jaryǵynan ekinshi ret aıyryp otyr. Ótken joly da qaıtadan qostyrǵan edik. Bul kúrdeli máselege aınaldy, - deıdi A.Áýbekerov.
Oqıǵa ornyna kelgen Oral qalasynyń ákimi Murat Baımenov máseleniń mán-jaıy tolyq tekserilip, anyqtalatynyn jetkizdi.
«Zachaganskıı» baý-baqsha seriktestiginiń jańadan bolǵan tóraǵasy Ashat Baetov berejaqqa jaýapty burynǵy basshy Asylbek Qabesov ekendigin aıtady.
- Men ázirge buǵan jaýapty emespin. Transformatordyń kilti, barlyq qujattary, «Batys Qazaqstan aımaqtyq elektr jelilik kompanııasymen» jasalǵan kelisim-shart Asylbek Qabesovtyń qolynda. Atalǵan mekememen kelisim-shartqa otyrǵannan keıin jaýaptymyn dep aıtamyn. Elektr jaryǵy úshin 71 mln teńge bereshekti burynǵy tóraǵa óteýi kerek, - dedi A.Baetov.
A.Qabesovtiń sózine qaraǵanda, bıylǵy 25 qańtardaǵy jınalystyń sheshimimen A.Baetov tóraǵa bolǵan.
- Men jınalystyń hattamasyn tirkep, tóraǵalyqtan bosaǵanym jóninde «Batys Qazaqstan aımaqtyq elektr jelilik kompanııasyna» aryz jazyp qaldyrdym. Qazirgi tóraǵany aparyp tanystyryp, osy kisimen shart jasaý kereksizder dep túsindirdim. Ol saılanarda qansha qaryz bar ekenin bildi. Qaryzdy bólip tóleý jóninde kelisilgen edi. Sodan beri tólemderdi ózi qabyldap otyr. Sol túsken qarajatty aparyp, tıisti mekememen eseptesse, bulaı bolmaýshy edi, - dedi A.Qabesov.
Mine, 12 myńdaı adam turatyn «Zachaganskıı» baý-baqsha seriktestigindegi daý osylaısha sozylyp keledi. Onyń qashan sheshiletini ázirge beımálim.
Eske sala keteıik, budan buryn Oralda turǵyndar baý-baqsha seriktestiginiń tóraǵasynyń qyzmetine narazylyq bildirgenin jazǵan edik.
Sondaı-aq Oralda baý-baqsha seriktestiginde daý-damaı tyıylmaı tur.