Oral qalasynda aınalma jol salý usynyldy
ORAL. KAZINFORM – Oralda Atyraý trassasy – Qazaq aýyl – Úmit shaǵynaýdany – Ósken – Derkól ózeni – Samara joly baǵytynda aınalma jol salý máselesi kóterildi.
BQO qoǵamdyq keńesiniń múshesi Manarbek Ǵabdýllınniń málim etkenindeı, bul – Oral qalasy úshin asa qajet iri joba.
Osy usynysty qoldaǵan BQO qoǵamdyq keńesiniń múshesi, zańger Baýyrjan Ahmetjannyń naqtylaýynsha, bul másele buryn da aıtylǵan. Munyń mańyzdylyǵy mynada, Oral qalasynyń uzyndyǵy shamamen 25 km. Keńes dáýiri kezinde qalanyń josparlanǵan syıymdylyǵy – 50 myń kólik. Dál qazir oblysta 193 myń, Oralda 109 myń avtokólik bar.
- Ásirese, keptelis pen jol apaty jıi bolatyn Sholohov kóshesimen aýyr júk kólikteri kúni-túni ótedi. Atyraýdan (ońtústikten) jáne Aqtóbeden (batystan) aǵylǵan júk kólikteri Oralǵa kirip, onshaqty shaqyrym júrip baryp, shyǵady, - deıdi B.Ahmetjan.
Onyń málimdeýinshe, munyń aýyrtpalyǵy kóp: kóshe, asfalt búlinedi, aýa lastanyp, shań, shý shyǵady, adamdarǵa qaýipti (jol apaty), keptelis týǵyzady, logıstıka ýaqyty kóp.
- Eger halyqpen aqyldasyp, tıimdiligin taldap, jobany syzyp, qunyn eseptep, durys merdiger tańdap, ony baqylaýda ustasaq, bul joba ulttyq trassa bolaıyn dep tur. Munyń paıdasy kóp. Qalanyń ishi tazaryp, shýy basylady, júk kólikterinen bosap, apat azaıady, kósheniń asfalty kópke jetedi, jańa ınfraqurylym (kafe, kempıng, saýda, jóndeý stantsııalary jáne basqa) ashylady jáne bıznesti damytady. Derkól, Ósken, Jambyl, Mahambet sııaqty aýyldar birden kórkeıedi, - dedi BQO qoǵamdyq keńesiniń múshesi.
Eske sala keteıik, budan buryn Oralda bas jospardy túzetý jobasyna qatysty shý shyqqanyn jazǵan edik.