Oral qalasynda aýla-kósheler qar sýyna tola bastady
ORAL. KAZINFORM – Oral qalasynda qardyń kúrt erýine baılanysty turǵyndardan túsken ótinishter kóbeıdi.
Instagram áleýmettik jelisinde beınejazbamen bólisken er adam Á.Bókeıhanov pen A.Baıtursynov kóshesin sý alyp, aýlaǵa kirip jatqanyn habarlaǵan.
- Bıyl bul jerdiń qary alynǵan joq, - deıdi turǵyn.
Oral qalasy ákimdiginen túsken málimetke qaraǵanda, atalǵan kósheni Zachagan kenti ákimdiginiń mamandary baryp qaraǵan. Ázirge aýlaǵa kiretindeı qaýip joq. Jaǵdaı baqylaýda.
- Jedel shtabqa Oral qalasy boıynsha 8 naýryzdan beri 94 ótinish túsip, sý sorý jumystary júrgizildi. Eń aldymen aýlalaryna sý kirý qaýpi tóngen turǵyndarǵa kómek kórsetilip jatyr. Zachagan kentiniń ózinde búgin kúndiz sý soratyn 22 tehnıka jumys istedi. Túnde bulardyń sany 30-ǵa deıin jetpek, - dep habarlady vedomstvodan.
Áleýmettik jelige júktelgen taǵy bir beınejazbada D.Qonaev shaǵynaýdany kópqabatty 16, 17, 18 jáne 19-turǵyn úıge kireberiste kóktem saıyn osyndaı jaǵdaıdyń qaıtalanatyny aıtylyp, avtokólikterdiń sý keship kele jatqany kórsetilgen.
Qala ákimdiginiń málimeti boıynsha osy kezge deıin 468 myń tekshe metr qar polıgondarǵa shyǵarylyp, 25 myń tekshe metr sý sorylǵan. 11 naýryz kúni bul jumysqa 250-ge jýyq arnaıy tehnıka, 300-ge jýyq adam jumyldyryldy. Sondaı-aq Oralda 150 shaqyrymdaı aryq júıesi bolsa, qazir onyń basym bóligi tazalandy. Ákimdik qyzmetkerlerinen táýlik boıy kezekshilik uıymdastyrylǵan.
Eske sala keteıik, budan buryn BQO-da aýylǵa kireberiste avtokólikter batpaqqa batyp jatýyna baılanysty ákimdik jaýap bergenin jazǵan bolatynbyz.