Oral qalasynda aýylmen baılanystyratyn joldy sý shaıyp ketti

ORAL. KAZINFORM – Oral qalasynda Derkól kentine qarasty Yntymaq aýylyna baratyn joldyń ústine qar sýy shyǵyp ketti. 

Turǵyndardyń sózine qaraǵanda, oqıǵa 13 naýryz kúni keshkisin boldy. Osyǵan baılanysty qalamen qatynas qıyndaǵan.

Derkól kenti ákimdiginen túsken málimetke qaraǵanda, greıder joldyń 20-30 metrdeı tusy bolmasa, qalǵany qalypty. Qazirgi kezde sý qubyr arqyly ótip jatyr.

— Yntymaq aýyly Derkól kentinen 15 shaqyrym qashyqtyqta ornalasqan, onda 500-den astam adam turady. Aýylmen baılanystyratyn basqa da jol bolǵandyqtan, qatynas úzilgen joq. Sý shaıyp ketken atalmysh joldy jóndeý úshin jobalyq-smetalyq qujattama jasalǵan. Qarjy bólingen jaǵdaıda jóndeledi, - dedi Kazinform tilshisine Derkól kenti ákiminiń orynbasary Roman Jýmıev.

Eske sala keteıik, budan buryn Oralda erigen qar sýyna baılanysty turǵyndardan ótinish kóbeıe túskenin jazǵan edik. Sondaı-aq BQO-da joldyń ústin sý basyp, kólik qozǵalysyna shekteý qoıyldy. BQO-da Derkóldegi sý deńgeıi Tasqala tusynda qaýipti shekke jaqyndady.