Oral qalasynda ákimdik aǵashtyń nelikten kesilip jatqanyn aıtty

ORAL. KAZINFORM – Oral qalasy ortalyǵynda aǵashtardyń jappaı kesilýi turǵyndar narazylyǵyn týǵyzdy.

Áleýmettik jelide júktelgen beınejazba men sýretterge qaraǵanda, aǵashtar N.Nazarbaev dańǵyly boıynda kesilgen. 

Osyǵan baılanysty qala ákimdigi jaýap berdi.

Vedomstvodan túsken málimetke qaraǵanda, qala ákimdigi janynda jasyldandyrý jáne abattandyrý máseleleri boıynsha ekologııalyq jumys toby áreket etedi. Onyń quramyna qalalyq máslıhat depýtattary, memlekettik mekemeler basshylary, aýyldyq okrýg ákimderi, qoǵamdyq uıymdar ókilderi men ekobelsendiler kiredi.

Jumys tobynyń maqsaty – qorshaǵan ortany lastaýǵa jol bermeý, ekologııalyq zalal mólsherin barynsha azaıtý, sondaı-aq turǵyndardyń sanıtarııalyq-epıdemıologııalyq qaýipsizdigin qamtamasyz etýge yqpal etý.

Qala ákimdigi sendirgenindeı, osy oraıda azamattardyń ómiri men densaýlyǵyna jáne kólik quraldaryna qaýip tóndiretin eski jáne apattyq jaǵdaıdaǵy aǵashtar kesiledi. Barlyq jumys qaýipsizdik talaptaryn saqtaı otyryp, qala ákimdigi ekologııalyq keńesiniń sheshimine sáıkes atqarylady.

Osy is-sharanyń jalǵasy retinde jas kóshetter otyrǵyzylady. Munyń ekologııalyq jáne estetıkalyq mańyzy bar. Jas kóshetterdi kútýge, turaqty sýarýǵa, agrotehnıkalyq is-sharalarǵa mán beriledi.

- Ekologııalyq keńestiń sheshimimen qalanyń 10 kóshesinde jasyl jelekterdi túgendeý jóninde dendrologııalyq jospar jasaldy. M.Ótemisov atyndaǵy Batys Qazaqstan ýnıversıtetiniń ǵylymı usynbalary negizinde óńirdiń tabıǵatyna beıimdelgen 5 myńnan astam túrli aǵash kóshetin otyrǵyzý josparlanýda. Budan bólek, jol janynda dekoratıvti jasyl jelekter egiledi, - dep habarlady qala ákimdiginen. 

Eske sala keteıik, budan buryn Oralda emhana aldyndaǵy eski skver joıylyp kete me, osyǵan baılanysty ákimdik jaýabyn bergen edik.