Oral qalasynda 70 adamnan salmonellez anyqtaldy

ORAL. KAZINFORM — Oral qalasynda salmonellezben aýyrǵandar sany 1,6 esege kóbeıip otyr.

Oral qalasy sanıtarııalyq-epıdemıologııalyq baqylaý basqarmasynyń basshysy Gaýhar Dúıseǵalıevanyń óńirlik kommýnıkatsııalar qyzmeti alańynda ótken brıfıngte málim etkenindeı, ótken jyly on aıda 42 adam salmonellezben aýyrsa, bıyl 70-ke jetken. 
Gaýhar Muqsınqyzynyń sózine qaraǵanda, derekterdiń 55 paıyzy uıymdastyrylǵan ujymdarǵa baratyn eresekter men balalarda tirkelip otyr.

— Ósýdiń yqtımal sebepteri — qaýipti ónimderdi paıdalaný, saqtaý jáne pisirý jaǵdaıynyń buzylýy. Salmonellezdiń aldyn alý maqsatynda aýrý oshaǵynda epıdemıologııalyq tekserý júrgiziledi. Turǵyndar arasynda túsindirý jumystary uıymdastyryldy, — dedi G.Dúıseǵalıeva.

Onyń aıtýynsha, jedel ishek ınfektsııalarynyń epıdemıologııalyq jaǵdaıy ótken jyldaǵydaı turaqty. Dızenterııamen syrqattanýshylyq ótken jylǵydan 9 derekke az. Belgilengen jiti ishek ınfektsııasy 2 derekke, belgilenbegen jiti ishek ınfektsııasy 3,2 esege tómendegen.

Basqarma málimeti boıynsha parazıtologııalyq ınfektsııalar boıynsha ehınokokkozben 2 adam aýyrsa, opıstorhozdyń 1,4, lıamblıozdyń 1,9 ese azaıǵany baıqalady. Degenmen askarıdozben aýyrǵandar sany 1,1 esege (2024 jyly on aıda — 75, bıyl — 89), enterobıozǵa shaldyqqandar 1,3 esege (106-dan 148-ge) ósken.

— Syrqattanýshylyq mektep jasyna deıingi balalardyń arasynda kezdesedi. Negizgi sebepteri — jeke bas gıgıenasyn saqtamaý, jýylmaǵan kókónister men jemisterdi paıdalaný. Aýrýshańdylyqtyń ósýin tómendetý maqsatynda sanıtarlyq aǵartý jumystary, sapaly sýmen jabdyqtaýdy baqylaý, aldyn alý boıynsha tekserýlerdi ýaqtyly júrgizý kúsheıtildi, — dep qosty G.Dúıseǵalıeva.

Eske sala keteıik, budan buryn Batys Qazaqstanda 75 adamnyń gonkong tumaýyna shaldyqqanyn jazǵan edik.